Shqipëria, e papërgatitur për emergjencën klimatike – Organizatat mjedisore kërkojnë më shumë fonde, rishikim të strategjisë kombëtare
Shqipëria mbetet në shkallë të ulët përgatitjeje për të adresuar emergjencën klimatike dhe arritur objektivat e shprehura për vitin 2030. Sipas organizatave mjedisore, rreth 55% e popullsisë së vendit tonë, kryesisht e përqendruar në Ultësirën Perëndimore, vlerësohet të jetë e ekspozuar ndaj rreziqeve të lidhura me klimën, një shifër më e lartë se vlerësimi global prej 40-45%.
Ndërkohë, ndikimi i këtyre fenomeneve ka veprim të drejtpërdrejtë mbi ekonominë me ndikim mbi prodhimin e energjisë nga burimet hidrike, rritjen e konsumit të energjisë, përdorimit të ujit, prodhimin bujqësor e blegtoral, duke cënuar drejtpërdrejtë sigurinë dhe mirëqenien e popullatës.
Gjatë forumit për klimën u publikuan edhe disa kërkesa drejtuar institucioneve përgjegjëse politikëbërëse dhe ligjzbatuese.
Sipas organizatave mjedisore, burimet financiare për të adresuar çështjet e klimës dhe pasojat e ndryshimeve klimatike janë të pamjaftueshme dhe nuk garantojnë arritjen e objektivave për zvogëlimin e shkarkimeve të gazeve serë apo marrjen e masave përshtatëse deri në vitin 2030.
Ola Mitre/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.