“Shqipëria përuron bazën ushtarake në Kuçovë muajin tjetër” – Blinken: Partneriteti me Shqipërinë më i fortë se kurrë

Sekretari Amerikan i Shtetit, Antony Blinken, vlerësoi angazhimin e Shqipërisë në NATO.

Në konferencën e përbashkët me kryeministrin Edi Rama, zyrtari i lartë ka vlerësuar kontributin e Shqipërisë në mbështetje të sfidave globale që ka pasur NATO dhe SHBA si në rastin e Ukrainës, Afganistanit etj.

Blinken tha se në fillim të muajit mars, do të inaugurohet baza ajrore e NATO-s në Kuçovë, ndërsa për bazën detare në Porto Romano do të zhvillohen diskutime.

“Përgjatë 15 viteve, Shqipëria ka dhënë kontribut domethënëse për aleancën. Muajin e ardhshëm Shqipëria do të përurojë bazën ajrore të NATO-s në Kuçovë.  Të 31 aleatët tanë që së shpejti do të bëhen 32 aleatë të NATO-s, do të sjellin përvoja të ndryshme, gjeografi të ndryshme, aftësi të ndryshme,  kapacitete të ndryshme, por secili prej nesh ka të njëjtin angazhim në fakt të fortë, të hekurt, i cili është të ndihmojmë njëri-tjetrin dhe gjithashtu të sakrifikojmë, madje në vitin e fundit çdo aleat ka rritur përqindjen në ndihmë të mbrojtjes si 2% i PBB-së,” tha Blinken.

Gjatë vizitës së Blinken në Tiranë, u nënshkruan dy Memorandumeve të Mirëkuptimit, ai i Mirëkuptimit për Programin e Shkëmbimit Akademik Fulbright dhe memorandumi i Mirëkuptimit për Kundërshtimin e Manipulimit të Informacionit të Shtetit të Huaj.

Alida Lula / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.