Si mund të përfitohet garancia sovrane nga fasonët? – Kushte preferenciale nga bankat, shuma maksimale e huasë 100 milionë lekë
Industria me material porositësi do të mund të përfitojë nga garancia sovrane e vënë në dispozicion nga qeveria prej 4 miliardë lekësh, e cila u mundëson lehtësim të kreditimit pranë bankave tregtare në vend.
Sipas vendimit të botuar në Fletoren Zyrtare, përfitues janë subjekte të industrisë përpunuese, kategoria NACE 2, për investime në teknologji dhe në inovacion, si dhe për blerje të lëndës së parë. Nëpërmjet kësaj mbështetje, ky sektor mund të lehtësohet për blerjen e makinerive, automatizimin e linjave të prodhimit, si dhe krijimin e kushteve strukturore për të realizuar ciklin e plotë (Made in Albania).
Por cilat janë kriteret për të përfituar? Sipas vendimit, Huamarrësi duhet të jetë subjekt i regjistruar në Qendrën Kombëtare të Biznesit; struktura e kapitalit të zotërohet 100% nga subjekte jopublike; nuk duhet të ketë detyrime tatimore të papaguara në momentin e aplikimit. nuk duhet të ketë kredi me probleme, me vonesa prej më shumë se 60 ditë, në historik dhe në momentin aktual në Regjistër Kredie.
Vlera e Huas e vendosur në dispozicion nga Huadhënësi për Huamarrësin nuk mund të jetë më e lartë se 100 milionë lekë. Referuar vendimit huadhënësi duhet të ofrojë huan me një normë interesi vjetore preferenciale, të barabartë me: normën mesatare të interesit të tri bonove të thesarit 12-mujore më të fundit të emetuara nga qeveria e Republikës së Shqipërisë (referenca/ indeksi); plus një marzh në një nivel maksimal prej 1.5%, në varësi të afatit të Huas dhe produktit me të cilin do të ofrohet Huaja. Tarifat e aplikueshme kundrejt huamarrësve për dhënien e kredisë nuk duhet të jenë në total më të larta se niveli maksimal prej 0.5%.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.