Si ndikoi reforma e pagava në produktivitet? – BSH: Rritja e pagave shton kostot e sektorit të biznesit deri në 10%  

Në prillin e vitit të kaluar, paga minimale arriti në 40 mijë lekë, duke shënuar dhe rritjen e fundit. Por si ka ndikuar kjo në rritjen e produktivitetit në punë?

Sipas të dhënave të Bankës së Shqipërisë, deri në muajin shtator të vitit që lamë pas, rritja e pagës mesatare në sektorin privat vazhdon të qëndrojë në vlera dyshifrore, ajo shënoi nivelin e 14.5%.

Të dhënat e Bankës së Shqipërisë arrijnë në konkluzionet se kostot e punës për njësi u rritën në 9.9% gjatë tremujorit të tretë të vitit 2023, në përshpejtim të normës 7.1% të regjistruar një tremujor më parë.

Sipas vrojtimit të Bankës së Shqipërisë, rritja e kostove të punës u ndikua nga rritja e shpejtë e pagave në sektorin privat, por nga ana tjetër produktiviteti i punës vazhdon të pakësohet, duke kontribuar gjthashu dhe në rritjen e kostove të punës për njësi.

Por nga ana tjetër, Banka Botërore në raportin e fundit për punën dhe produktivitetin në Shqipëri, thekson se deri në fillim të vitit 2020, tregu i punës ishte në drejtim pozitiv.  Pavarësisht rritjeve në punësim produktiviteti i punës në Shqipëri është i ulët, gjë e cila nuk është reflektuar në rritjen e pagave.

Diamila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.