Sistemi bankar shqiptar – Sejko: Bilance të shëndetshme dhe një shkallë të lartë rezistence ndaj goditjeve të mundshme financiare! Të mbështesin eksportuesit për kursin

Guvernatori i Bankës së Shqiperisë Gent Sejko mori pjesë në një tryezë diskutimi me sistemin bankar dhe Shoqatën Shqiptare të Bankave – AAB në kuadër të ndërtimit të një dialogu të vazhdueshëm si dhe të intensifikimit të bashkëpunimit për çështje me rëndësi të veçantë aktuale me sistemin bankar.

Sipas njoftimit gjatë takimit u prezantua vlerësimi i Bankës së Shqipërisë për situatën financiare në vend, zhvillimet e kësaj periudhe dhe sfidat e së ardhmes dhe u theksua se shëndeti financiar i ekonomisë shqiptare është i konsiderueshëm, falë përmirësimeve të vazhdueshme në sektorin e jashtëm, vënies nën kontroll të borxhit publik dhe fleksibilitetit operacional e bilanceve të shëndosha të biznesit shqiptar.

Sejko u shpreh se sektori bankar ka bilance të shëndetshme dhe një shkallë të lartë rezistence ndaj goditjeve të mundshme financiare dhe se kjo rezistencë pasqyron modelin e tij të qëndrueshëm të biznesit, shkallën e lartë të likuiditetit dhe nivelin e kënaqshëm të kapitalizimit.

Gjithashtu dhe forcimi i kursit të këmbimit, ndikimi i tij në ecurinë e disa prej bizneseve eksportuese shqiptare dhe kontributi që mund të japë sistemi bankar në këtë drejtim.

“Forcimi i kursit të këmbimit të Lekut ka pasqyruar përmirësimin e vazhdueshëm të bilancit të shkëmbimeve tregtare e financiare me jashtë, si dhe rritjen e interesit për të kursyer e investuar në monedhën tonë kombëtare”, shkruhet në njoftim.

Në informacionin e shpërndarë per  mediat evidentohet gjithashtu nevoja që bankat tregtare, të zhvillojnë më tej produktin e kontratave forward në lidhje me menaxhimin e kursit të këmbimit nga klientët, për ta ofruar atë në cilindo moment që do kërkohet, veçanërisht nga bizneset eksportuese. “Bankave iu kërkua që të jenë sa më mbështetëse për aspekte të tjera të marrëdhënieve të biznesit bankë-klient, veçanërisht në ato të lidhura me kreditimin, në mënyrë që, në këtë moment të vështirë, barra e bizneseve eksportuese të lehtësohet sa të jetë e mundur dhe zhvillimi i sistemit bankar shqiptar në drejtim të ofrimit të shërbimeve dhe produkteve të reja,” thuhet në njoftim.

Sipas Sejkos Banka e Shqipërisë i ka kushtuar një rëndësi të veçantë këtyre shërbimeve, nëpërmjet krijimit të terrenit të nevojshëm rregullativ, infrastrukturës teknike etj. dhe mbetet e gatshme të mbështesë të gjitha kërkesat apo nevojat në këtë drejtim.

E . S  / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.