Soros redukton 40% të stafit – Fondacioni kaloi nën kontrollin e djalit të themeluesit

Sipas Bloomberg, Fondacioni “Shoqëria e Hapur” i George Soros do të pushojë të paktën 40% të stafit një muaj pasi 92-vjeçari njoftoi se ia dorëzoi drejtimin e fondacionit shumë miliardë dollarësh djalit të tij, Alexander.

Shkurtimet e vendeve të punës u njoftuan në një deklaratë të nënshkruar nga Alexander Soros dhe presidenti i fondacionit, Mark Malloch-Brown. Ai tha se fondacioni do t’i nënshtrohej “ndryshimeve të rëndësishme” në modelin e tij të funksionimit. Më tej, sqarohej se përmes këtij modeli të ri, bordi synon të transformojë operacionet në të gjithë rrjetin global, me synimin për të gjeneruar një organizatë më të shkathët dhe më të aftë për të ndërtuar mbi arritjet e kaluara; si dhe për t’u përballur me sfidat urgjente dhe në zhvillim.

Një zëdhënës i Fondacionit “Shoqëria e Hapur” tha se zbatimi i vizionit të ri të organizatës kërkon “vendime të vështira” dhe se planifikon të reduktojë numrin e punonjësve me jo më pak se 40% globalisht. Fondacioni numëron rreth 800 punonjës në të gjithë globin.

Në qershor, George Soros, një investitor miliarder me origjinë hungareze, filantrop dhe kontribues në kauzat liberale, njoftoi se kishte emëruar djalin e tij 37-vjeçar, Alexander Soros, si kryetar i ri i organizatës. Në një intervistë në Wall Street Journal duke njoftuar vendimin, Alexander Soros tha se ai dhe babai i tij “mendojnë njësoj”, por se ai ishte më politikan se babai i tij. Ai tha gjithashtu se nën udhëheqjen e tij, planifikon të fokusojë fondacionin më shumë në politikën e brendshme të Shteteve të Bashkuara të Amerikës.

Forbes vlerëson se pasuria neto e George Soros është 6.7 miliardë dollarë, por ai ka dhuruar shumë më shumë se kaq – 32 miliardë dollarë – për fondacionin e tij që nga viti 1984.

Organizata jofitimprurëse e Soros është “financuesi më i madh privat në botë i grupeve të pavarura që punojnë për drejtësinë, qeverisjen demokratike dhe të drejtat e njeriut”, sipas faqes së internetit të fondacionit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.