Spanja heq TVSH-në për ushqimet bazë për të ndihmuar në rritjen e kostos së jetesës!

Spanja do të heqë tatimin mbi vlerën e shtuar për artikujt ushqimorë bazë për gjashtë muaj, si pjesë e një sërë masash të reja për të ndihmuar njerëzit të përballen me koston në rritje të jetesës.

Kryeministri Pedro Sánchez njoftoi se TVSH-ja do të ulet nga 4 në 0 % për ushqimet bazë, si buka, djathi dhe perimet, ndërsa do të ulet nga 10 në 5 % për vajin dhe makaronat.

Qeveria miratoi gjithashtu një ndihmë të njëhershme prej 200 euro për familjet me të ardhura prej 27,000 euro ose më pak për të kompensuar rritjen e çmimeve të ushqimeve.

Paketa e re e ndihmës kundër krizës vlen 10 miliardë euro, duke i çuar shpenzimet e qeverisë për masat e ndihmës në 45 miliardë euro.

Që kur Rusia nisi pushtimin e saj të Ukrainës në shkurt, qeveria spanjolle ka njoftuar paketa të shumta ndihme për të ndihmuar familjet më të varfra të përballen me inflacionin, i cili është rritur në të gjithë Europën.

Por ndërsa inflacioni është ulur në Spanjë, çmimet e ushqimeve kanë mbetur të larta. Qeveria spanjolle duhej të vendoste këtë javë nëse do të zgjaste masat e ndihmës për vitin e ardhshëm.

Sánchez tha se do të zgjasë TVSH-në e reduktuar në çmimet e energjisë elektrike dhe gazit për gjashtë muaj. Ai tha gjithashtu se një ndalim për ndërprerjen e furnizimit me energji për familjet e cenueshme do të mbetet në fuqi gjatë gjithë vitit 2023.

Zbritja prej 50 % në transportin publik urban do të zgjatet për gjysmën e parë të vitit 2023, shtoi ai.

Sánchez njoftoi se ai gjithashtu do të zgjasë një kufi prej 2 % për rritjen e qirave për një vit dhe se dëbimet do të mbeten të pezulluara për gjashtë muajt e ardhshëm.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.