Synohet lehtësimi i totalit të borxhit të jashtëm – Riblerje brenda këtij viti e një pjese të eurobondeve

Aktualisht Shqipëria numëron katër eurobonde aktivë, të cilët po kthehen në një peshë të rëndë në buxhetin e shtetit. Ministria e Financave pohon se politikat e normave të interesit si të Rezervës Federale ashtu edhe të Bankës Qendrore Evropiane mund të sjellin rritjeve të kostovë të shërbimit të borxhit të jashtëm në vijim.

Në këto kushte, Ministria e Financave parashikon që kostot e borxhit jashtëm të shënojnë rritje të mëtejshme krahasuar me vitin 2023, konkretisht nga 3.4% në 4.3%. Për rrjedhojë, shpenzimet për interesa të borxhit, gjatë vitit 2024 janë planifikuar me një rritje prej rreth 9.8 miliardë lekësh.

Shkak për të cilin duket se ajo do të riblejë brenda këtij viti një pjesë të borxhit të emetuar përmes katër eurobondeve. Procedura ishte parashikuar që në mars të këtij viti, bashkë me emetimin e eurobondit prej 600 milionë eurosh të qershorit këtij viti. Bëhet fjalë për realizimin e një blerje (buy back) të një pjese të Eurobondit që maturohet në 2025 (prej 200 milionë Euro apo 21,902 milion Lekë). Një tërheqje e tillë parashikon lehtësimin e totalit të borxhit të emetuar përmes eurobondeve.

Aktualisht në portofolin e borxhit shtetëror numërohen 4 Eurobonde aktivë në vlerën totale prej 255 miliardë lekë (apo 2.4 miLiardë Euro). Shka për të cilin Qeveria jo vetëm parashikon procedura bye back, si këtë vit ashtu edhe në ta ardhshmin, por edhe ndryshim të strategjisë për borxhin e jashtëm.

Huamarrja e huaj parashikohet që gjatë vitit 2024 të realizohet kryesisht nëpërmjet disbursimit të huave që financojnë ecurinë e zbatimit të projekteve prioritare të qeverisë, si dhe disbursimit të mbështetjeve buxhetore procedurat dhe kushtet paraprake të të cilave mund të arrijnë të plotësohen gjatë vitit 2024. Në total huamarrja e huaj gjatë vitit 2024 vlerësohet të jetë rreth 36.6 miliardë lekë.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.