Tensionet në Lindjen e Mesme rrisin naftën – SHBA ngre “task force” në Detin e Kuq, Houthi paralajëron për sulme

Nafta po qëndron në rritje edhe në sesionin e sotëm, duke zgjeruar fitimet prej 1% të së martës, për shkak të shqetësimeve për çrregullimin e tregtisë globale dhe tensioneve gjeopolitike në Lindjen e Mesme, pas sulmeve të grupit militant Houthi ndaj anijeve në Detin e Kuq.

Nafta Brent e Londrës po tregtohet në rreth 80 dollarë për fuçi, ndërsa nafta Bruto amerikane po tregtohet në rreth 75 dollarë për fuçi. Të martën, Uashingtoni ngriti një “task force” për të mbrojtur tregtinë në Detin e Kuq, pasi sulmet e militantëve në Jemen që mbështeten nga Irani, detyruan kompanitë e mëdha të transportit detar të ndryshojnë rrugën, duke shtuar frikën e ndërprerjeve të vazhdueshme në tregtinë globale. Por, grupi Houthi paralajmëroi se do të sfidojë mision detar të udhëhequr nga SHBA dhe do të vazhdojnë të sulmojë anijet në Detin e Kuq, në mbështetje të lëvizjes së Hamasit në Gaza.

Rreth 15% e trafikut botëror të anijeve kalon në Detin e Kuq dhe përmes Kanalit të Suezit. Megjithatë, ndikimi në furnizimin me naftë ka qenë i kufizuar deri më tani, thanë analistët, pasi pjesa më e madhe e naftës bruto të Lindjes së Mesme eksportohet nëpërmjet Ngushticës së Hormuzit.

Ndër zhvillimet e tjera, SHBA bleu 2.1 milionë fuçi naftë bruto, e cila do të dorëzohet në shkurt, njoftoi të martën Departamenti amerikan i Energjisë, duke i çuar blerjet totale në rreth 11 milionë fuçi.

Administrata amerikane vazhdon të rimbushë Rezervat Strategjike të Naftës, pas shitjes më të madhe në histori vitin e kaluar. Ndërkohë, sipas të dhënave të Institutit Amerikan të Naftës, rezervat e naftës bruto u rritën javën e kaluar, kundrejt parashikimeve të analistëve për një rënie të tyre. Megjithatë, tregjet po presin të dhënat zyrtare që do të publikohen më vonë gjatë ditës së sotme nga Administrata për Informimin mbi Energjinë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.