Tërmeti dëmtoi 20% të prodhimit të ushqimit në Turqi – Llogaritet se dëmet në bujqësi ishin shumë të rënda

Tërmeti vdekjeprurës që goditi Turqinë jugore dhe Sirinë fqinje më 6 shkurt, dëmtoi më shumë se 20% të prodhimit bujqësor dhe blegtoral të Turqisë, sipas të dhënave të konfirmuara nga OKB. Më shumë se 55 mijë njerëz humbën jetën nga tërmeti 7.8 ballë dhe lëkundjet që pasuan.

Tërmeti shkaktoi “dëme të rënda në bujqësi, duke përfshirë të korrat, blegtorinë, peshkimin dhe akuakulturën, si dhe infrastrukturën bujqësore në zonat e prekura, sipas detajeve të publikuara nga Organizata e OKB-së për Ushqimin dhe Bujqësinë – FAO. Tërmeti goditi 11 provinca kritike bujqësore, duke prekur 15.73 milionë njerëz dhe më shumë se 20% të prodhimit të ushqimit të vendit.

Zona më e prekur nga tërmeti, e njohur si ‘Gjysmëhëna pjellore’ e Turqisë, përbën rreth 15% të PBB-së bujqësore dhe kontribuon në pothuajse 20% të eksporteve bujqësore të Turqisë.

Tërmeti shkaktoi humbje prej 1.19 miliardë eurosh për shkak të dëmtimit të infrastrukturës, blegtorisë dhe kulturave bujqësore, dhe 4.68 miliardë euro në sektorin e bujqësisë. Kur ra tërmeti, shtëpitë u shembën, të korrat u shkatërruan dhe kafshët u vranë. U verifikuA gjithashtu mungesë ushqimi dhe vaksinash për bagëtinë. Njëkohësisht ka pasur mungesë të punëtorëve, gjë që ndihet sidomos tani që po afron sezoni i korrjes.

FAO po kërkon 103 miliardë euro donacione për të ndihmuar zonat e goditura nga tërmeti në Turqi. Kjo pasi fundi i sezonit të mbjelljes është afër. Apeli bëhet për të ndihmuar menjëherë fermerët turq duke iu siguruar atyre pleh dhe fara. Ky konsiderohet dhe si shansi i vetëm për të ruajtur nivelin e prodhimit këtë vit. Sipas FAO-s, më shumë se një e treta e njerëzve në zonat e prekura nga tërmeti varen nga bujqësia për mbijetesën e tyre.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.