Testimi i TEC-eve lundrues nis në mars – KESH: Drejt finalizimit tenderi i karburantit. Do ketë edhe test besueshmërie 72 orësh

Korporata Elektroenergjetike Shqiptare do të nisë testimit e TEC-eve lundures gjatë muajit që vjen, ndërkohë që dhe në fund të marsit është parashikuar dhe testi i besueshmërisë prej 72 orëve ku të gjithë agregatët së bashku do të punojnë pa ndërprerje”.

KESH bën me dije për TV SCAN se procedura për blerjen e karburantit, e hapur në fillim të shkurtit, nuk është finalizuar ende, por sipas kushteve të kontratës kompania duhet të fillojë furnizimin me karburant sipas një plani të përcaktuar në kushtet e kontratës në fillim të muajit mars.

“Me marrjen e sasisë së naftës, do të fillojë dhe testimit i të gjithë agregateve në mënyrë individuale, për të shkuar më pas te testi i besueshmërisë 72 orësh për të gjithë agregatët”, – saktëson KESH. Sipas procedurës tenderuese, synohet blerja e 4000 ton karburant, për 2 termocentralet lundrues, që ndodhen në Triport të Vlorës.

Ndërkaq, lidhur me çmimin e produktit të kërkuar, bazuar në praktikat brenda vendit, parashikohet që çmimi të jetë i formuar nga një referencë në tregjet ndërkombëtare, të cilit i shtohet një çmim Premium. Po ashtu, në dokumentet e tenderit KESH specifikonte se 2 TEC-et lundrues kanë nevojën e furnizimit me lëndë djegëse të llojit HFO, me përmbajtje të squfurit jo më të madhe se 0.5%.

Më herët, ky dikaster shpalli edhe kompaninë fituese që do të depozitojë dhe ngarkojë – shkarkojë lëndën djegëse për funksionimin e 2 termocentraleve lundrues në Vlorë, që është “La Petrolifera Italo – Albanese”.

Këto impiante të prodhimit të energjisë nga karburanti u tenderuan përmes një procedure emergjente në kuadër të krizës energjetike gati 2 vite më parë, por deri më tani ato nuk janë vënë në punë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.