Turqia, në kërkim të ndihmës ndërkombëtare – Sektori i turizmit do të preket për një periudhë afatshkurtër

Në momentin që Turqia kërkohë ndihmë ndërkombëtare për të përballuar situatën e krijuar nga tërmeti i fuqishëm që goditi vendin këtë të hënë, vëmendja u përqendrua në organizatat ndërkombëtare të financimit si Banka Botërore dhe Fondi Monetar Ndërkombëtar.

Një gjë pozitive për ekonominë është se nga ajo që duket deri tani, ka më pak dëmtime në ndërtesat tregtare në krahasim me ato rezidenciale, duke lënë të kuotohet se bizneset do të jenë më pak të prekura. Turqia ka një nga 20 ekonomitë më të mëdha në botë dhe ka përjetuar një rritje të shpejtë ekonomie gjatë presidencës së Erdoan.

Gjithësesi vendi aktualisht po përballet me fatkeqësinë e dytë të madhe natyrore në 24 vjet, pas tërmetit të vitit 1999 që vrau 17 mijë njerëz. Tërmeti të hënës pritet të ketë më shumë pasoja në financat e Turqisë. Sipas ekonomistëve ngjarja tragjike do të thajë rezervat dhe do të përkeqësojë situatën ekonomike.

Epiqendra e tërmetit ishte shumë pranë qytetit kryesor për prodhimin dhe industrinë në vend: Gaziantep. Mijëra fabrika janë ndërtuar në jug të qytetit me 3 milion banorë, pranë kufirit me Sirinë. Sipas të dhënave zyrtare të autoriteteve turke, prodhimi ka ndaluar në një shkallë të gjerë, me banorët që i tremben lëkundjeve të reja në orët dhe ditët e ardhshme.

Sektori i turizmit gjithashtu do të preket për një periudhë afatshkurtër dhe vetëm atëherë kur njerëzit të rifitojnë besimin dhe jeta ekonomike të jetë e qëndrueshme, që ky burim i rëndësishëm i monedhave të huaja të rimëkëmbet.

Performanca e partisë së Erdogan AKP – për drejtësinë dhe zhvillimin – në këtë krizë mund të ketë pasoja të rëndësishme në të ardhmen e vendit, me zgjedhjet parlamentare dhe presidenciale që priten të mbahen në muajin qershor të këtij viti.

Në një kohë që marrëdhëniet e Turqisë me vendet aleate janë acaruar vitet e fundit dhe lidhjet me Rusinë janë përforcuar, Ankaraja bëri një apel të menjëhershëm për ndihmë ndërkombëtare pas tërmetit. Një apel që gjeti premtime për mbështetje nëpër botë, ndërsa ekipe ndërkombëtare kanë mbërritur në juglindje të Turqisë.

Gjermania nisi të dërgonte gjeneratorë, tenda, batanije dhe njësi për filtrimin e ujit, duke premtuar se do të sjellë dhe streha emergjence.

Presidenti amerikan Joe Biden premtoi se do të japë të gjithë ndihmën e nevojshme, ndërsa ai francez Emmanuel Macron me anë të një mesazhi në profilin zyrtar të Tëitter u shpreh se vendi i tij ishte gati të dërgonte ndihmë mjekësore.

Analistët këmbëngulin se vendet do të kufizohen nga vështirësitë ekonomike që po përjeton secili, në dërgimin e ndihmave.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.