Varshava dhe Kievi arrijnë një marrëveshje për drithërat – Qëllimi, të evitohet rritja e çmimeve!

Zyrtarët polakë dhe ukrainas ranë dakord që autokolonat e drithërave nga Ukraina që kalojnë tranzit nga Polonia për eksport jashtë vendit do të mbyllen, ruhen dhe monitorohen për të siguruar që prodhimet të ndalojnë ‘vërshimin’ në tregun polak dhe të mos luajnë kërdi me çmimet.

Njoftimi i së martës erdhi pas dy ditë bisedimesh intensive pas protestave të fermerëve polakë, të cilët thanë se pjesa më e madhe e grurit ukrainas po qëndronte në Poloni dhe po krijonte një tepri që u shkaktoi atyre humbje të mëdha.

Marrëveshja do t’i japë fund gjithashtu një ndalimi të përkohshëm të lëshuar nga Polonia të shtunën për të adresuar protestat për hyrjen e grurit nga Ukraina. Hungaria dhe Sllovakia, të cilat janë gjithashtu të prekura nga tranziti i produkteve bujqësore ukrainase, morën më vonë masa të ngjashme. Këto lëvizje tërhoqën zemërimin e degës ekzekutive të Bashkimit Europian, Komisionit Europian, i cili menaxhon tregtinë për 27 vendet anëtare.

Ministri polak i Bujqësisë Robert Telus tha në një konferencë shtypi të martën se Varshava dhe Kievi “kanë përpunuar mekanizma që nënkuptojnë se asnjë ton i vetëm grurë (Ukrainë) nuk do të mbetet në Poloni, se të gjitha do të kalojnë në tranzit”.

Pasi Rusia bllokoi kalimet tradicionale të eksportit detar në mes të luftës në Ukrainë, Bashkimi Europian hoqi detyrimet për drithin ukrainas për të lehtësuar transportin e tij në Afrikë dhe Lindjen e Mesme dhe ofroi të paguante një kompensim, të cilin fermerët thanë se ishte i pamjaftueshëm.

Pjesa më e madhe e drithit përfundon në vendet tranzit dhe disa sindikata polake dhe politikanë të opozitës akuzojnë kompanitë e lidhura me qeverinë për shkaktimin e problemit duke blerë drithë të lirë, me cilësi të ulët ukrainase dhe më pas duke e shitur atë në fabrikat e bukës dhe makaronave si prodhim cilësor i lartë polak .

Partia kryesore në pushtet në Poloni, Ligji dhe Drejtësia, po kërkon të lehtësojë pakënaqësinë e fermerëve – bazën e votuesve të partisë – përpara zgjedhjeve parlamentare të vjeshtës.

Në Rumani, një vend tjetër i prekur nga prodhimi i tepërt ukrainas, Partia Social Demokrate në pushtet tha të martën se do t’u kërkojë partnerëve të koalicionit qeverisës që “urgjentisht” të kërkojnë të lëshojnë një pezullim të përkohshëm të importeve të produkteve ushqimore nga Ukraina.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.