Von der Leyen në Ukrainë përpara vendimit për zgjerimin e bllokut!

Presidentja e Komisionit Europian Ursula von der Leyen ishte në një vizitë në Ukrainë të shtunën, teksa BE-ja përpiqet të sigurojë popullin ukrainas për mbështetjen e bllokut dhe përpara raportit kyç mbi aspiratat e anëtarësimit të Kievit.

“Unë jam këtu për të diskutuar rrugën e pranimit të Ukrainës në BE,” tha von der Leyen në X nga Kievi. “Dhe si do të vazhdojmë ta bëjmë Rusinë të paguajë për luftën e saj të agresionit.”

Vizita vjen disa ditë përpara se Komisioni Europian të publikojë raportin e tij të progresit më 8 nëntor se sa mirë Ukraina dhe anëtarët e tjerë aspirantë po përmbushin kushtet ekonomike, ligjore dhe të tjera të bllokut për t’u anëtarësuar. Në fillim të kësaj jave, von der Leyen vizitoi disa vende në Ballkanin Perëndimor që gjithashtu aspirojnë të bëhen anëtarë të BE-së.

“Sigurisht që paketa e zgjerimit do të jetë në krye të axhendës, por edhe mbështetja financiare dhe ushtarake”, u tha von der Leyen gazetarëve më herët. “Po ashtu edhe paketa e 12-të e sanksioneve, kështu që një shportë e tërë çështjesh duhet të diskutojmë. Dhe mesazhi më i rëndësishëm është sigurimi se ne qëndrojmë pranë Ukrainës për aq kohë sa duhet.”

Zyrtarët dhe diplomatët e BE-së thanë se në raportin e 8 nëntorit, Brukseli do të rekomandojë hapjen e negociatave të pranimit me Ukrainën dhe Moldavinë  të kushtëzuara nga paralajmërimet teknike ku vendet duhet të bëjnë më shumë përparim.

Raporti i progresit është një hap kyç në vendimin e bllokut nëse do të fillojë bisedimet e pranimit me Kievin. Bazuar në vlerësimin e Komisionit, udhëheqësit e BE-së do të diskutojnë më pas në takimin e tyre në mes të dhjetorit nëse do të nisin bisedimet zyrtare të anëtarësimit me Ukrainën. Çdo vendim për zgjerim kërkon mbështetjen e të 27 vendeve të BE-së.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.