Zero TVSH për ushqimin në Poloni – Qeveria vendos të zgjasë vendimin deri në 2024
Polonia mund të zgjasë normën zero të TVSH-së për produktet ushqimore deri në vitin 2024 nëse inflacioni vazhdon të qëndrojë i lartë. Deklarata u bë nga kryeministri i vendit Mateusz Morawiecki. Vendi uli taksat për një numër të madh prodhimesh që nga karburantet e deri tek lehrat, për të ndihmuar konsumatorët të përballen me inflacionin në rritje, por iu desh të kthehej sërish në taksa më të larta për benzinën këtë vit në përputhje me rregullat e Komisionit Europian.
Megjithatë, Brukseli ka lejuar që TVSH-ja për prodhimet ushqimore të mbahet në zero. Ndërsa inflacioni u ngadalësua në 14.7% në prill nga 16.1% në mars, sipas një vlerësimi të shpejtë nga zyra e statistikave, ai mbetet një çështje kyçe politike në prag të zgjedhjeve të përgjithshme të këtij viti.
Në një deklaratë për mediat kreu i ekzekutivit u shpreh se nëse inflacioni nuk bie shumë ndjeshëm, nuk përjashtohet që në tremujorin e katërt të këtij viti të merret një vendim për të zgjatur këtë lehtësim edhe për vitin e ardhshëm.
Vendimi do të merret kur të dhënat e inflacionit për këtë vit dhe parashikimet për vitin 2024 të jenë të disponueshme, shtoi kryeministri, duke theksuar se masa kushton rreth 2.18 miliardë euro në vit në të ardhura buxhetore të humbura. Polonia regjistroi të dhëna zhgënjyese të shitjeve me pakicë dhe të prodhimit industrial në tremujorin e parë, sipas shifrave të publikuara muajin e kaluar.
Krahasuar me rënien e parashikuar prej 5.9%, shitjet me pakicë të Polonisë me çmime konstante ranë me 7.3% nga viti në vit në mars, ndërsa prodhimi industrial ra me 2.9% në vend të 1.9% të parashikuar. Gjithashtu, Indeksi i Çmimeve të Prodhimit u ngadalësua në 10.1%, nën vlerën e vlerësuar prej 11%.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.