1 miliard USD në ditë investime në fotovoltaikë – Për herë të parë tejkalohet shuma e investuar për prodhimin e naftës

Rreth 2.8 trilionë dollarë pritet të jenë investimet botërore në sektorin e energjisë këtë vit, nga të cilat të paktën 1.7 trilionë do të orientohen drejt teknologjive të pastra si automjetet elektrike, burimet e rinovueshme dhe ruajtja e energjisë. Kjo konfirmohet nga një raport i Agjencisë Ndërkombëtare të Energjisë  – IEA, e cila madje vlerëson se investimet konkretisht në fotovoltaikë do të kalojnë 1 miliard dollarë në ditë këtë vit.

Si rezultat, investimet në fotovoltaikë pritet të tejkalojnë ato të kanalizuara në prodhimin e naftës për herë të parë, sipas kreut të IEA, Fatih Birol. Megjithatë, investimet totale në qymyr, gaz natyror dhe naftë pritet të mbeten të larta në pak më shumë se 1 trilion dollarë.

Në raport thuhet se investimi në lëndët djegëse fosile sot është më shumë se dyfishi i nivelit të nevojshëm për të arritur neutralitetin ndaj qymyrit deri në vitin 2050. Hendeku në veçanti në sektorin e qymyrit është jashtëzakonisht i madh: investimi i sotëm është pothuajse gjashtë herë më i lartë se kërkesat për neutralitetin ndaj tij deri në vitin 2050.

Pavarësisht rritjes së investimeve në format e energjisë së pastër, sasia e investimeve të kanalizuara ende në lëndët djegëse fosile konsiderohet një arsye për shqetësim, për shkak të shumave të larta që kanalizohen në zhvillimin e industrisë së karburanteve fosile.

Sipas Kombeve të Bashkuara që nga shekulli i 19-të, aktivitetet njerëzore kanë qenë shtytësi kryesor i ndryshimeve klimatike, veçanërisht për shkak të djegies së lëndëve djegëse fosile, si qymyri, nafta dhe gazi natyror.

Qershorin e kaluar, Sekretari i Përgjithshëm i OKB-së Antonio Guterres hodhi poshtë dhe kritikoi gjetjet e reja në lidhje me mundësinë e nxjerrjes së karburanteve fosile. Ai tha se ishte iluzion dhe bëri thirrje që e gjithë industria të hiqte dorë.

Pavarësisht shqetësimeve intensive, industria e naftës dhe gazit vazhdon të rritet ndërkombëtarisht. Për shembull, në tetor 2022, kreu i BP, Bernard Looney, deklaroi se strategjia e kompanisë është e fokusuar në investimet në hidrokarbure, por edhe në tranzicionin e planifikuar të energjisë.

Ndërsa do të ketë ende shqetësime për paratë që rrjedhin në lëndët djegëse fosile, Birol u përpoq të nxjerrë në pah faktorin që do të nxisë tranzicionin e energjisë. Ai theksoi se energjia e pastër po ecën shpejt – më shpejt nga sa e kuptojnë shumë njerëz. Kjo duket qartë nga modelet e investimeve, ku teknologjitë e pastra po largohen nga karburantet fosile. Për çdo dollar të investuar në lëndët djegëse fosile, rreth 1.7 dollarë tani drejtohen drejt energjisë së pastër, përfundoi ai.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.