FED rrëzon dollarin amerikan – Prek nivelin më të ulët në 9 muajt e fundit, përballë “shportës”

Dollari është dobësuar ndjeshëm në sesionin e sotëm, duke prekur sërish nivelin më të ulët në 9 muajt e fundit, përballë shportës me 6 monedhat kryesore ndërkombëtare.

Presidenti i Rezervës Federale,Jerome Powell, në përfundim të takimit 2-ditor, foli për progresin e bërë në uljen e inflacionit, ndërsa paralajmëroi për shtrëngimin e mëtejshëm të politikave monetare. Gjithashtu, Powell njoftoi rritjen e normës bazë të interesit me 25 pikë bazë, që pritej gjerësisht nga investitorët.

Analistët prisnin një qëndrim më të moderuar nga Rezerva Federale dhe për këtë arsye, dollari amerikan u dobësua ndjeshëm, menjëherë pas njoftimit të këtyre vendimeve. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare ka rënë pranë 101, niveli më i ulët që nga prilli i vitit 2022.

Në anën tjetër, euro është ngjitur pranë 1.1 dollarëve, niveli më i lartë që nga 4 prilli i vitit të kaluar. Gjithashtu, ditën e sotme investitorët po presin edhe takimin e Bankës Qendrore Europiane dhe Bankës së Anglisë, të cilat pritet të rrisin normën bazë të interesit me 50 pikë bazë.

Në tregun e kriptomonedhave, bitcoin është rritur ndjeshëm dhe po tregtohet në rreth 23,800 dollarë, ndërsa ethereum po tregtohet në rreth 1670 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.