Aksident tragjik nga përplasja e trenave në Greqi – Dyshohet për gabim njerëzor. Sistemet elektronike nuk punojnë prej vitesh

Një aksident tragjik hekurudhor ndodhi në Greqi në orën 23.00 të së martës, kur një tren mallrash i nisur nga Selaniku për në Larisë u përplas me trenin e pasagjerëve Inter City 62, i nisur nga Athina për në Selanik me të paktën 350 persona në bord dhe 20 anëtarë stafi. Sipas të dhënave, mbi 38 persona kanë ndërruar jete dhe 66 të tjerë janë plagosur.

Kompania hekurudhore 3 orë pas përplasjes së dy trenave, me një deklaratë për media prej vetëm 52 fjalësh, konfirmoi lajmin duke sqaruar se trenat po udhëtonin në të njëjën linjë dhe në kahe të kundërta. Sipas saj shkaku i tragjedisë është një gabim njerëzor.

Ndërkohë këto janë orë dramatike për pasagjerët e Inter City 62, të plagosurit dhe familjarët e viktimave, pasi autoritetet greke u shprehën se numri i viktimave mund të jetë dhe më i lartë pasi shumë prej tyre mund të jenë bllokuar në vagonë.

Ndërkohë në disa intervista për media të ndryshme greke, presidenti i shoqatës së makinistëve, u shpreh i qartë për ato që i cilësonte si arsyet e vetme të kësaj tragjedie. Sipas tij, sistemet elektronike nuk punojnë prej vitesh.

Por, gjithashtu ai iu referua dhe përgjegjësive që duhet të mbahen për sa i përket informimit të makinistëve. Sidomos duke theksuar cështjen e kontrollit qendror elektronik, duke thënë se asgjë nuk funksionon dhe se cdo gjë kryhet manualisht. Ai shtoi se as treguesit, dritat e trafikut dhe kontrolli i trafikut nuk funksionojnë. Nëse ato do të punonin makinistët do e kishin parë sinjalin e kuq dhe trenat do të kishin ndaluar 500 metra larg njëri – tjetrit, shpjegoi ai.

Megjithatë, problemet kryesore të rrjetit hekurudhor të vendit nuk janë të reja. Pavarësisht qindra milionë euro të shpenzuara gjatë 30 viteve të fundit, mungesa e sistemeve moderne të sinjalizimit dhe telekomandimit në të gjithë gjatësinë e aksit hekurudhor Athinë-Selanik vazhdon të bllokojë hekurudhën greke.

Vjetërsimi i 15 viteve të fundit, projektet “e përjetshme” të modernizimit që ende nuk kanë përfunduar, mungesa e burimeve që rezulton në mungesë të mirëmbajtjes së rëndë të rrjetit, krijojnë një koktej shpërthyes. Për sa kohë që problemet nuk zgjidhen, rrjeti hekurudhor degradohet, me rezultatet që reflektohen në vonesat ditore, trenat e ndalur, defektet, itineraret e humbur.

Informacioni jepet nga drejtuesi i stacionit te drejtuesi i stacionit tjetër me radio, duke çuar në vonesa dhe metoda konvencionale operimi, të cilat nuk mund të mposhtin faktorin njerëzor pavarësisht përvojës së madhe të makinistëve të trenave.

Dorina Kurtaj /SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.