Inteligjenca artificiale monitoron vatrat e zjarreve – Mjeti i ri i Google do të aplikohet në 15 shtete

Kristi Ceta/reuters

 

Google do t’u ofrojë përdoruesve mundësinë e monitorimit analitik të vatrave të zjarrit përmes Inteligjencës Artificiale.

Mjeti i ri, sipas informacioneve të kompanisë, është në procesin e aplikimit në 15 shtete në të gjithë Evropën dhe Afrikën. Më konkretisht, këto vende janë: Andorra, Bosnja dhe Hercegovina, Franca, Greqia, Spanja, Italia, Kenia, Kroacia, Qiproja, Mali i Zi, Monako, Portugalia, Ruanda, Sllovenia dhe Turqia.

Informacioni shfaqet përmes sinjalizimeve dhe veçorive që ofrojnë të dhëna se si të qëndroni të sigurt afër një zjarri. Modeli IA i monitorimit të zjarrit është trajnuar përmes burimeve të shumta të të dhënave, duke përfshirë imazhet satelitore.

Pasi ka prezantuar këtë shërbim të ri këtë verë, Google ka ‘hartuar’ tashmë më shumë se 40 zjarre në Evropën Jugore, duke përfshirë zjarret në Spanjë, Greqi dhe Qipro muajin e kaluar, si dhe të tjera në Portugali e në Kenia.

Google shfaq kufijtë e zjarrit në “Kërko” dhe “Hartat” dhe i vë informacionet të disponueshme përmes njoftimeve, duke plotësuar përpjekjet ekzistuese për të ndihmuar njerëzit të kenë akses në të dhënat dhe të qëndrojnë të sigurt. Vetëm në javën e parë të korrikut, pas zjarreve që shpërthyen në Evropë dhe Afrikë, rreth 1.4 milionë njerëz ndoqën informacionet e Google në lidhje me zjarret.

Këto sinjalizime bazohen në cilësimet e përdoruesit dhe preferencat gjuhësore, duke u mundësuar udhëtarëve gjatë sezonit turistik të marrin informacionin lokal në kohën e duhur dhe në gjuhën e tyre. Informacioni shfaqet gjithashtu në Google Maps kur përdorin funksionin e navigimit, duke i ndihmuar udhëtarët të kuptojnë nëse ka zjarre në afërsi të tyre.

Ky funksion tashmë është lançuar në vendet e prekura nga zjarret e verës së fundit, ndërsa kompania synon ta zgjerojë atë edhe në vende të tjera. Shërbimi i zbulimit të zjarrit është aktualisht i disponueshëm në SHBA, Kanada, Australi, Brazil, Argjentinë, Kili dhe Meksikë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.