“Aeroporti i Vlorës, pikë e re referimi për britanikët” – Zv/kryeministrja Balluku, për “Express”: Në mars-dhjetor 2025, rreth 1 milionë udhëtarë

Shqipëria ka mbetur prej vitesh sekreti më i ruajtur i Gadishullit Ballkanik, me shumë turistë që e shpërfillin këtë vend si një destinacion pushimi në favor të Kroacisë më të famshme. Por, vitet e fundit, Riviera Shqiptare ka përjetuar një rritje të vizitorëve – përfshirë britanikët – të cilët kanë zbuluar se ujërat e saj të pastra, plazhet me rërë dhe peisazhet e bukura mund të përjetohen me një çmim shumë të lirë. Nis në këtë mënyrë reportazhi i britanikes ‘Express’ që përqendrohet kryesisht në rritjen graduale të popullaritet që po fiton vendi ynë mes turistëve.

Sipas këtij shkrimi, Shqipëria së shpejti mund të mirëpresë shumë pushues të tjerë pasi po përgatitet të ndërtojë një aeroport tjetër ndërkombëtar, i cili do t’i shërbejë një prej qyteteve më të bukura të Rivierës Shqiptare. Vlora, është bërë veçanërisht e famshme në mesin e turistëve falë vijës bregdetare shkëmbore, plazheve të bukura, ushqimit të jashtëzakonshëm të ndikuar nga kuzhina italiane dhe historisë së pasur.

Ndërtimi i Aeroportit Ndërkombëtar të Vlorës do të jetë një arsye tjetër për turistët që të udhëtojnë drejt kësaj rivierë, pasi do të shkurtojë kohën e udhëtimit, vijon më tej shkrimi.

Një fluturim direkt nga Londra në Tiranë zgjat pak më shumë se tre orë dhe mund të arrijë me më pak se 100 paund edhe në kulm të sezonit turistik.

Planet për ndërtimin e Aeroportit Ndërkombëtar të Vlorës u njoftuan për herë të parë nga qeveria shqiptare në maj 2017. Katër vjet më vonë, Mabetex International – një grup i specializuar në inxhinierinë civile në shkallë të gjerë, tha se po planifikonte të investonte më shumë se 88 milionë paund (103.5 milionë euro) për fazën e parë e ndërtimit të aeroportit, duke përfshirë një pistë dhe terminal.

Zëvendëskryeministrja Belinda Balluku është shprehur se i gjithë aeroporti do të mbulohet me panele diellore. Ato do të vendosen në mënyrë që të mos lindin probleme me uljen dhe ngritjen e avionëve. Këto do të prodhojnë 5.2 MWH energji të rinovueshme, e cila do të jetë për nevojat e aeroportit.

Ndërsa ende nuk është konfirmuar, ka të ngjarë që linjat ajrore që operojnë nga aeroportet e Mbretërisë së Bashkuar do të shpallin itinerare të reja për të arritur në Aeroportin Ndërkombëtar të Vlorës, duke pasur parasysh popullaritetin në rritje të zonës. Zv/ kryeministrja Balluku ndau pritshmëritë e qeverisë, teksa tha se më shumë se 1 milion pasagjerë parashikohen të kalojnë tranzit përmes Aeroportit Ndërkombëtar të Vlorës vetëm midis marsit dhe dhjetorit 2025.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.