Airbnb do të paguajë 567 milionë euro – Shuma, për të zgjidhur hetimin tatimor në Itali
Airbnb do të paguajë 576 milionë euro për të zgjidhur një mosmarrëveshje me autoritetet tatimore italiane që përfshin periudhën midis 2017 dhe 2021.
Autoritetet italiane kishin urdhëruar sekuestrimin e 779 milionë eurove nga Airbnb në nëntor si pjesë e një hetimi për evazion fiskal, duke e akuzuar platformën për dështim në mbledhjen e një takse prej 21% mbi të ardhurat nga qiratë e marra nga pronarët nga viti 2017 deri në 2021.
Në një deklaratë për media kompania u shpreh se nuk do të përpiqej të rekuperonte shumën në kurriz të pronarëve të banesave. Dhe theksoi se Italia mbetet një treg i rëndësishëm për Airbnb. Sipas saj mijëra pronarë janë pjesë e platformës në Itali, me të ardhura mesatare vjetore prej rreth 3.500 € në 2022-shin.
Shumica dërrmuese e tyre janë familje të zakonshme që përdorin platformën për të ardhura shtesë, gjë që ndihmon gati dy të tretat e këtyre njerëzve.
Në fund të tetorit, qeveria italiane deklaroi synimin e saj për të rritur luftën kundër qirave afatshkurtra që shmangin taksat dhe për të rritur tatimin për pronarët që ofrojnë më shumë se një apartament në platforma të tilla si Airbnb.
Një ndryshim në projektbuxhetin 2024 parashikon krijimin e një ‘kodi kombëtar identifikimi’ të lidhur me akomodimin turistik, i cili do të bëjë të mundur gjurmimin e atyre që nuk janë deklaruar në organet tatimore. Në këtë mënyrë, sipas autoriteteve italiane, do të ketë transparencë dhe do të rregullohet i gjithë sistemi. Gjithashtu kjo masë buxhetore do të rrisë edhe të ardhurat e shtetit, si dhe do të ndihmonte në uljen e barrës tatimore për familjet.
Sa i përket rritjes së planifikuar të taksës, ajo do të aplikohet vetëm nga banesa e dytë e marrë me qira nga secili pronar, kështu që nuk do të jetë për të gjithë. Pronarët e banesave me qira afatshkurtër mund të zgjedhin aktualisht një tarifë fikse prej 21%. Kjo normë do të rritet në 26% për banesat e tjera të dhëna me qira për më pak se 30 ditë. Projektbuxheti në formën e tij aktuale, sqaron se si platforma të tilla si Airbnb duhet të mbajnë taksat mbi të ardhurat për mikpritësit joprofesionistë në Itali duke ecur përpara.
Platformat e qirave afatshkurtra akuzohen rregullisht nga profesionistët e hoteleve për konkurencë të pandershme dhe se kontribuojnë në rritjen e qirave dhe mungesën e akomodimit të përballueshëm për banorët e qyteteve turistike.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.