“Ari i lëngshëm” kap nivele rekord – Çmimi i vajit të ullirit rritet mbi 100%!

Çmimet e vajit të ullirit u rritën në rekorde të reja, pasi thatësirat e mëdha në vendet kryesore prodhuese zvogëluan furnizimet. Çmimet globale të vajit të ullirit u rritën në 8,900 dollarë për ton në shtator, të nxitura nga “moti jashtëzakonisht i thatë” në Mesdhe, sipas një raporti të fundit nga Departamenti i Bujqësisë i Shteteve të Bashkuara. Tashmë, çmimi mesatar në gusht ishte 130% më i lartë krahasuar me një vit më parë dhe nuk tregoi “asnjë shenjë lehtësimi”, tha USDA.

Spanja, prodhuesi dhe eksportuesi më i madh në botë i vajit të ullirit, është goditur nga një thatësirë intensive prej muajsh. Vendi sapo regjistroi verën e tretë më të nxehtë, me temperaturë mesatare të verës 1.3°C më të lartë se normalja, sipas agjencisë shtetërore meteorologjike AEMET.

Sipas të dhënave nga firma e inteligjencës së tregut të mallrave Mintec, prodhimi i vajit të ullirit në Spanjë në sezonin e fundit ka rënë në rreth 610,000 ton, që është një rënie prej më shumë se 50% krahasuar me 1.3 deri në 1.5 milion ton të zakonshëm.

Kjo ka shtuar kompleksitetin e situatës dhe shqetësimet për reduktimin e prodhimit në vendet e tjera të mëdha europiane prodhuese të vajit të ullirit, duke përfshirë Italinë dhe Greqinë, ku mbizotërojnë kushtet e thatësirës.

Greqia dhe Italia janë prodhuesit e dytë dhe të tretë më të mëdhenj të vajit të ullirit, sipas Këshillit Ndërkombëtar të Ullirit, një organizatë ndërqeveritare e përbërë nga anëtarë që përbëjnë më shumë se 98% të prodhimit të ullirit në nivel global.

Çmimet e vajit të ullirit në Andaluzinë e Spanjës u rritën në 8,45 € (9,02 dollarë) për kilogram në shtator, tregoi standardi i Mintec. Ai shënon “çmimin më të lartë të regjistruar ndonjëherë për vajin e ullirit spanjoll” bazuar në të dhënat e kompanisë që shtrihen mbi 20 deri në 30 vjet dhe përfaqëson një rritje prej 111% nga viti në vit.

Çmimet në rritje, për atë që nganjëherë quhet “ari i lëngshëm”, kanë bërë që disa ta vjedhin atë. Rreth 50,000 litra vaj ulliri ekstra të virgjër në një nga fabrikat e vajit në Spanjë, Marin Serrano El Lagar, u vodhën në orët e para të 30 gushtit, sipas raportimeve të mediave lokale. Kjo është më shumë se 420,000 euro, ose rreth 450,000 dollarë vaj ulliri që humbi biznesi familjar. Deri më tani nuk ka pasur të arrestuar.

Kjo nuk është e gjitha. Pak para kësaj, hajdutët u larguan me 6,000 litra vaj ulliri ekstra të virgjër me vlerë 50,000 euro nga fabrika e vajit Terraverne, tha gazeta spanjolle El Munco. Kompjuterët, tavolinat, dhe karriget e kompanisë gjithashtu thuhet se u grabitën.

Turqia, e cila është gjithashtu një prodhues i rëndësishëm i vajit të ullirit, ka pezulluar eksportet me shumicë deri më 1 nëntor, një lëvizje që rezulton nga rritja globale e çmimeve.

Edel Strazimiri  / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.