Bankat po shtrëngojnë standardet e kreditimit – Sipas sondazhit të Fed, ndikim ka patur rritja e normave të interesit

Në fillim të këtij viti ishte e vështirë për bizneset dhe familjet të merrnin hua, por pas kolapsit të tre bankave rajonale të SHBA dhe një serie rritjesh të normave të interest nga Rezerva Federale, marrja e kredisë është bërë pak më e vështirë.

Më shumë huadhënës kanë forcuar standardet e tyre në vazhdën e trazirave në rritje brenda sektorit bankar, sipas Anketës tremujore të Opinionit të Zyrtarëve të Lartë të Kredive në Rezervën Federale.

Të anketuarit në sondazh ia atribuan ndryshimet në standardet e kreditimit pasigurisë ekonomike, përkeqësimit të vlerave të kolateralit dhe shqetësimeve më të gjera për kostot e financimit të bankave dhe pozicionet e likuiditetit. Për më tepër, huadhënësit raportuan se presin të shtrëngojnë standardet në të gjitha kategoritë e kredive për pjesën e mbetur të këtij viti, duke përmendur shqetësimet e mësipërme si dhe tërheqjet e klientëve.

Kur bankat shtrëngojnë standardet e tyre, kreditë mund të jenë më të vështira për t’u marrë, duke reduktuar mundësitë për bizneset që të bëjnë përmirësime kapitale ose të punësojnë staf dhe nga ana tjetër që konsumatorët të blejnë një shtëpi, blejnë ose japin me qira një makinë, ose të bëjnë përmirësime në shtëpi.

Sipas ekspertëve, dëshmi të mëtejshme të shtrëngimit të kushteve të huadhënies dhe një krizë të mundshme kredie mund të shihen në rënien e dukshme të kërkesës për kredi nga firmat e mëdha dhe të mesme. Kështu, që politikbërësit dhe investitorët duhet të parashikojnë që kjo të ndikojë në ekonominë reale në një afat të afërt, pasi investimet, punësimi dhe rritja ngadalësohen për shkak të huadhënies më të shtrënguar.

Fed anketon deri në 80 banka të mëdha amerikane dhe 24 degë vendase të bankave të huaja dhe pyet zyrtarët për tema të tilla si ndryshimet në kushtet dhe standardet e huadhënies, si dhe kërkesën e familjeve për kredi.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.