BE zbulon deri në 16 miliardë euro fonde të pashpërndara ndërsa blloku kërkon 100 miliardë euro shtesë!
Brukseli po kërkon nga anëtarët e BE-së një shtesë prej 100 miliardë eurosh për katër vitet e ardhshme, por disa vende kanë vërejtur 16 miliardë euro fonde të papërdorura.
Danimarka dhe vendet e tjera kanë zbuluar deri në 16 miliardë euro në fonde të pashpërndara të BE-së që Brukseli nuk duket se i kishte marrë parasysh kur u bënte një kërkesë vendeve anëtare për 100 miliardë euro shtesë për katër vitet e ardhshme, raporton Financial Times.
“E gjithë kjo e bën të qartë se Komisioni nuk i ka bërë detyrat e tij siç duhet përpara se të kërkojë shumë para shtesë dhe shtetet anëtare nuk janë të lumtura për këtë”, tha një diplomat i BE-së për gazetën në Mbretërinë e Bashkuar.
Mbushja e propozuar prej 67 miliardë eurosh për buxhetin afatgjatë të bllokut 2021-2027, plus 33 miliardë euro kredi, është një nga çështjet më të diskutueshme midis vendeve anëtare ndërsa liderët mblidhen për samitin e BE-së në Bruksel të enjten dhe të premten.
Gjysma e kërkesës shtesë të Komisionit – 17 miliardë euro grante dhe 33 miliardë euro kredi – synon të mbështesë Ukrainën për katër vitet e ardhshme. Ka afërsisht një marrëveshje unanime midis qeverive të BE-së për këtë pjesë të fondeve.
Por shumë kryeqytete kanë hedhur poshtë kërkesat e bllokut për 50 miliardë euro të tjera për të mbuluar nevojat e financimit, të tilla si pagesat e interesit më të larta se sa pritej për huamarrjen e përbashkët të BE-së për planin e rimëkëmbjes së pandemisë prej 800 miliardë euro.
Shtetet anëtare argumentojnë se buxhetet kombëtare janë nën presion ekstrem. Si të tillë, ata i kërkuan Brukselit të gjente kursime të brendshme ose para të pashpenzuara, të cilat Kopenhagen dhe të tjerët i kanë hulumtuar – dhe i kanë gjetur – vetë.
Edel Strazimiri / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.