Brukseli rekomandon hapjen e bisedimeve të anëtarësimit në BE me Bosnje dhe Hercegovinën!

Duke njoftuar vendimin e ekzekutivit të saj të martën në mëngjes në një fjalim në Parlamentin Europian, presidentja e Komisionit Ursula von der Leyen tha: “Që kur i dhamë statusin e kandidatit, Bosnja dhe Hercegovina ka ndërmarrë hapa mbresëlënës përpara. Më shumë përparim është arritur në pak më shumë se një vit sesa në më shumë se një dekadë”. “Sigurisht, më shumë përparim është i nevojshëm për t’u bashkuar me Unionin tonë. Por vendi po tregon se mund të përmbushë kriteret e anëtarësimit dhe aspiratën e qytetarëve të tij për të qenë pjesë e familjes sonë,” shtoi von der Leyen. “E ardhmja e Bosnjë dhe Hercegovinës qëndron në Bashkimin tonë.”

Rekomandimi i Komisionit do të duhet të miratohet nga të 27 udhëheqësit e BE-së, të cilët do të vendosin në një samit javën e ardhshme në Bruksel. Bosnja dhe Hercegovina, të cilës iu dha statusi i kandidatit për në BE në dhjetor 2022 – është një nga pesë vendet e Ballkanit Perëndimor të njohur si kandidatë zyrtarë për t’u anëtarësuar në BE. Deri më sot, ishte i vetmi nga këto vende që ende nuk kishte hyrë në negociatat formale të pranimit.

Ndarjet e rrënjosura thellë etnike dhe vonesat në reformat kushtetuese, gjyqësore dhe zgjedhore e kanë penguar vendin të arrijë hapin me fqinjët e tij në rrugën e anëtarësimit në BE. Në vlerësimin e tij vjetor të përparimit të vendeve kandidate në BE drejt anëtarësimit të publikuar tetorin e kaluar, Komisioni tha se i duhej të shihte reforma të mëtejshme kushtetuese dhe zgjedhore dhe përafrim më të mirë me politikën e jashtme të BE-së përpara se oferta e Bosnjës të mund të avancohej.

Në veçanti, ekzekutivi i BE-së ishte i shqetësuar nga mënyra se si Republika Srpska, një nga dy entitetet territoriale të vendit të përbërë kryesisht nga serbë etnikë, kishte mbrojtur një qëndrim neutral ndaj pushtimit të plotë të Ukrainës nga Rusia. Vetëm muajin e kaluar, Presidenti i Republika Srpska Milorad Dodik mbajti takimin e tij të katërt me presidentin rus Vladimir Putin që kur trupat ruse pushtuan Ukrainën. Megjithatë, von der Leyen siguroi të martën se “Bosnja dhe Hercegovina tani është plotësisht në linjë me politikën tonë të jashtme dhe të sigurisë, e cila është vendimtare në këto kohë trazirash gjeopolitike.”

Shumë vende të BE-së, të quajtura të ashtuquajturat ‘miq të Bosnjës’, kanë kërkuar që rruga e Bosnjës drejt anëtarësimit në BE të avancohet me të njëjtin ritëm si ajo e Ukrainës. Ato përfshijnë Austrinë, Kroacinë, Italinë, Hungarinë dhe Slloveninë. Pushtimi i Rusisë ka injektuar një ndjenjë energjie të përtërirë në zgjerimin e ardhshëm të Bashkimit Europian, me integrimin e shteteve të Ballkanit Perëndimor që shihet nga shumë njerëz si vendimtar për të forcuar rëndësinë gjeopolitike të bllokut.

Duke iu përgjigjur njoftimit të martën, ministri i jashtëm i Austrisë Alexander Schallenberg tha se hapja e bisedimeve me Bosnje dhe Hercegovinën është një “sinjal i fortë” për “integrimin e Ballkanit Perëndimor” nga BE. Nëse liderët e BE-së i japin dritë jeshile rekomandimit të Komisionit, Bosnja dhe Hercegovina mund të vazhdojë në fazën tjetër të bisedimeve.

Por këto bisedime do të shënonin vetëm fillimin e një procesi të gjatë dhe shpesh të ndërlikuar negociatash, i cili mund të marrë vite përpara se një vend të bëhet një anëtar i plotë. Komisioni pritet gjithashtu të paraqesë një projekt-kornizë negociuese për pranimin e Ukrainës dhe Moldavisë këtë javë. Kjo kornizë do të kërkojë gjithashtu miratimin e udhëheqësve të BE-së.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.