Bujqësia “vuan” nga moti i pazakontë – Gjithnjë e më pak prodhime në tregjet europiane

Moti ekstrem po shkatërron prodhimet bujqësore në Itali. Shoqata e fermerëve Coldiretti thotë se, gjashtë nga 10 dardha janë dëmtuar si pasojë e përmbytjeve, breshrit, temperaturave të larta rekord dhe insekteve. Me rendimentin e dardhës në Itali me 63% në krahasim me vitin e kaluar, oferta e përgjithshme në Europë ka rënë me 13%. Edhe prodhimi i dardhës në Francë ka rënë me 23%.

Gjithashtu, edhe prodhimi i rrushit, shalqinjve, kajsive, domateve dhe patëllxhanëve në Itali ka regjistruar humbje për shkak të klimës. Por fermerët e frutave nuk janë të vetmit të prekur nga tekat e motit.

Prodhimi i grurit dhe qumështit është ulur me 10%, ndërsa prodhimi i rrushit për verë me 14% krahasuar me vitin 2022. Prodhimi i mjaltit ka rënë në një rekord prej 70%, pasi bletët janë shumë “të lodhura” nga nxehtësia për të pjalmuar bimët, thotë shoqata.

Fermerët po përdorin teknologji të tilla si dronët dhe satelitët për të kursyer ujin që të përballojnë ndryshimet klimatike.

Ky ka qenë një vit i vështirë për Italinë. Në maj, Emilia Romagna, një rajon i rëndësishëm i bujqësisë dhe sidomos prodhimit të frutave, u godit nga përmbytjet shkatërruese që morën jetën e 15 personave.

Muajin e kaluar, vendi arriti afër rekordit të tij më të lartë të temperaturës, ndërsa valët e të nxehtit përfshinë Mesdheun dhe shkaktuan zjarre vdekjeprurëse, sidomos në Siçili. Nga ana tjetër, Lombardia, në veri të Italisë, u godit nga breshëri.

Por, kjo situatë nuk është vetëm në Itali. Në fillim të këtij viti, konsumatorët në Mbretërinë e Bashkuar u përballën me raftet e frutave dhe perimeve të boshatisura dhe çmimet e larta pasi moti i pazakontë ndërpreu prodhimin në Spanjë dhe Marok. Rritja e kostove të energjisë dhe burokracia e Brexit kontribuan në këto mungesa.

Në korrik, gati gjysma e Bashkimit Europian u ekspozua ndaj thatësirës, ​​duke nxitur frikën e mëtejshme për prodhimin dhe çmimet e ushqimeve.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.