Taksë e jashtëzakonshme për bankat në Itali – Të ardhurat, për të ndihmuar kredimarrësit në vështirësi

Qeveria italiane miratoi një taksë të jashtëzakonshme prej 40% për bankat gjatë këtij viti, me të ardhurat që do të përdoren për të ndihmuar kredimarrësit në vështirësi, si dhe për të ulur taksat.

Zëvendëskryeministri dhe ministri i Infrastrukturës, Matteo Salvini, tha në një konferencë për mediat se, mjafton të shikohen fitimet e bankave në gjysmën e parë të vitit 2023, gjithashtu rezultati i rritjes së normave të interesit nga Banka Qendrore Europiane, për të kuptuar se nuk po flasim për disa miliona, por për miliarda.

Sipas tij, ekziston një hendek i madh midis normave të aplikuara për kreditë dhe depozitat. Salvini theksoi se, taksa prej 40% mbi fitimet shtesë të bankave që arrijnë në disa miliardë euro do të përdoret për lehtësimin dhe uljen e taksave, si dhe për mbështetjen financiare për kredimarrësit në shtëpitë e para.

Sipas një raporti nga instituti kërkimor Censis, afërsisht 80% e familjeve me kredi jofunksionale kishin zgjedhur norma të ndryshueshme, duke i bërë ato veçanërisht të cenueshme ndaj ndikimit të rritjes së normave të interesit.

Qeveria italiane ka qenë kritike ndaj rritjeve të përsëritura të normave të interesit të Bankës Qendrore Europiane. Rritje të tilla e kanë bërë më të shtrenjtë për Italinë shërbimin e borxhit, duke u renditur i dyti më i madh në Eurozonë. Politikëbërësit kanë frikë se këto norma interesi në rritje mund të çojnë në një recesion, duke përkeqësuar sfidat financiare me të cilat përballen pronarët e pambrojtur të shtëpive.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.