CEO në Britani, rritje page prej 16% – Niveli mesatar 118 herë më i lartë se i një punëtori

Drejtorët Ekzekutivë të kompanive më të mëdha britanike regjistruan rritjen e pagave të tyre me 16% në vitin 2022, duke i çuar të ardhurat e tyre mesatare në 118 herë më shumë se mesatarja e punonjësve me kohë të plotë në Mbretërinë e Bashkuar, ndërsa punonjësit vazhdojnë të luftojnë me inflacionin në rritje.

Paga mesatare e një CEO të ‘FTSE 100’ vitin e kaluar arriti në 3.91 milionë paund, niveli më i lartë që nga viti 2017 dhe 500 mijë paund deri në vitin 2021, sipas hulumtimit vjetor nga Qendra e Pagave të Larta.

Raporti i pagës mesatare të Drejtorit Ekzekutiv ndaj një punonjësi mesatar në Mbretërinë e Bashkuar me kohë të plotë, në 118, u rrit nga 108 herë në 2021 – shin dhe 79 herë në 2020 – ën.

Sipas ekspertëve, në një kohë kur kaq shumë familje po luftojnë me kostot e jetesës, një model ekonomik që i jep përparësi rritjes së pagave prej gjysmë milioni paund për drejtuesit që tashmë janë multimilionerë, tregon se gjërat nuk po shkojnë ashtu si duhet.

Megjithatë, paga e Drejtorëve ekzekutivë në Britani mbetet shumë më e ulët se në Shtetet e Bashkuara të Amerikës. Një studim i ri këtë muaj tregoi se shefat ekzekutivë të S&P 500 fituan mesatarisht 16.7 milionë dollarë në vitin 2022, 272 herë më shumë se paga mesatare e punëtorëve.

Paga e lartë e ekzekutivit në Britani ka qenë prej kohësh e diskutueshme, veçanërisht me pagat për punëtorët e zakonshëm që rriten shumë më ngadalë dhe mezi lëvizin në terma realë gjatë dekadës së fundit.

Rritja e pagave bazë në Mbretërinë e Bashkuar këtë vit ka shënuar një normë rekord, tregojnë të dhënat zyrtare, por kjo vetëm kohët e fundit ka filluar të mbajë ritmin me çmimet galopante të konsumit.

Katër nga CEO-t e ‘FTSE 100’ fituan më shumë se 10 milionë paund vitin e kaluar, zbuloi Qendra e Pagave të Larta, e udhëhequr nga CEO i AstraZeneca, Pascal Soriot, i cili mori 15.3 milionë paund.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.