Cilat bashki mbajnë peshën më të madhe të borxheve? – 56.5 mln euro detyrime të papaguara, punët publike bëhen pa fonde

Në fund të Shtatorit 2022, pushteti vendor regjistron një stok të detyrimeve të papaguara kundrejt bizneseve dhe qytetarëve në vlerën e rreth 6.7 miliardë lekëve apo  56.5 milionë euro.  Ajo që vihet re është se në raport me tre muaj më parë, detyrimet kanë pësuar një rënie të lehtë me afro 3.3 milionë euro.

Rënia është e gjithashtu e ndjeshme edhe në krahasim me fundvitin 2020, ndërsa po ta krahasojmë me  2021 ka një rritje shumë të lehtë. Sa i takon këtij viti, 30.8 milionë euro janë detyrime të papaguara për investime publike,  5.2 milionë euro vendime të gjykatave dhe 5.8 milionë euro shërbime dhe mirëmbajtje.

Por cilat janë bashkitë që kanë më shumë detyrime?   Referuar listës, vlera e borxheve që kanë bashkitë nuk lidhet domosdoshmërisht me sipërfaqen e tyre apo numrin e popullsisë, përvec Bashkisë së Tiranës.

Konkretisht në vendin e parë renditet Bashkia Tiranë me 12.6 milionë euro detyrime të papaguara, e ndjekur nga bashkia Kavajë me 6.3 milionë euro borxhe, më pas renditet bashkia Vorë, detyrimet e secilës regjistrohen në 3.5 milionë euro, Bashkia Berat me 2.8 milionë euro dhe Pogradec me 2.7 milionë euro.

Më pas renditen bashkitë, Lezhë, Kamëz, Dibër, Cerrik dhe Durrës.  Ndërsa në fund të listës së bashkive sa i takon vlerës së borxheve renditen bashkitë Korçë, Shkodër dhe Patos.

Qeveria qendrore ka përcaktuar për pushtetin vendor një kalendar për shlyerjen e detyrimeve të prapambetura i cili mesa duket nuk po zbatohet, pasi disa prej bashkive kanë thelluar borxhin në raport me periudhat e mëparshme.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.