Çmimi i gazit natyror, 40 euro për megavat orë – Tregu europian, pas vjeshtës pritet sërish rritje çmimi

Gazi natyror ka arritur në pragun e 40 eurove për megavat orë në tregun europian. Ndërsa parashikohet se me kalimin e vjeshtës çmimet do të rriten përsëri.

Konkretisht, të martën në standardin holandez të TTF, kontratat e dorëzimit në shtator dhe mbyllën me 40 euro/MWh, duke marrë një rritje prej 16.2%, e cila brenda sesionit arriti në 18%. Sa i përket kontratave të dorëzimit në tetor ato u mbyllën me 44.9 euro/MWh ndërsa për nëntorin me 53 euro/MWh.

Sipas Bloomberg, ky kërcim i mprehtë i atribuohet, mes të tjerash grevës së përgjithshme të punëtorëve në sektorin e LNG të Australisë, duke shkaktuar pasoja  të mëdha në furnizimin global me gaz natyror të lëngshëm.

Bisedimet e zyrtarëve të sindikatës dhe Woodside Energy Group Ltd arritën të krijojnë një urë lidhëse por pa një marrëveshje përfundimtare.

Reduktimet mund të jenë deri në 10% të eksporteve globale të LNG. Në një kohë që Europa rrallë blen gaz australian, do i duhet të garojë me vende të tjera në Azi për ngarkesat zëvendësuese.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.