Debate për rritjen e normës së interesit nga BQE – Holzmann mbështet një rritje prej 0.75 pikë përqindjeje në dhjetor

Banka Qendrore Europiane duhet të ruajë ritmin e rritjes së normave të interesit në takimin e radhës për të bindur publikun se politikëbërësit janë “seriozë” për zbutjen e inflacionit.

Deklarata u bë nga Robert Holzmann, kreu i Bankës Kombëtare të Austrisë dhe anëtar i këshillit drejtues të BQE-së, i cili mbështeti një rritje të tretë radhazi me 0,75 pikë përqindjeje të normës bazë në takimin e 15 dhjetorit. Lëvizja do të rriste kostot standarde të huamarrjes në 2.25 përqind.

Komentet e tij nënvizojnë potencialin për një përplasje në votimin e ardhshëm, me politikëbërësit të ndarë midis mbajtjes së ritmit dhe kalimit në rritje më të vogla pas shenjave të një recesioni.

Holzmann tha se nuk shihte asnjë shenjë se inflacioni po frenohet në Eurozonë dhe  pret vetëm një ngadalësim të rritjes ekonomike, ose një recesion të butë, në vend të një rënie të thellë në bllokun 19-vendesh.

Inflacioni në Eurozonë arriti një rekord prej 10.6% me bazë vjetore në tetor, duke reflektuar rritjen e çmimeve të energjisë dhe ushqimeve pas pushtimit rus të Ukrainës.

Ekonomistët presin që niveli I inflacionit të bjerë vitin e ardhshëm, megjithëse çmimet bazë, duke përjashtuar energjinë dhe ushqimin, u rritën me 5% muajin e kaluar dhe ka të ngjarë të vazhdojnë të rriten shumë mbi objektivin prej 2% të BQE.

Disa politikanë europianë kanë filluar të paralajmërojnë BQE-në që të mos rrisë normat në nivele shumë të larta. Muajin e kaluar, kryeministrja e Italisë Giorgia Meloni tha se politika më e shtrënguar monetare “konsiderohet si një zgjedhje e nxituar”, ndërsa presidenti i Francës Emmanuel Macron paralajmëroi se ai ishte i shqetësuar për bankat qendrore që “dëmtojnë kërkesën” për të trajtuar inflacionin.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.