Depozitat bankare rriten me 4%, mbi 1.5 trilionë lekë – Shtohen më së shumti ato me afat në valutë, pakësohen në monedhën kombëtare

Gjatë gjashtëmujorit të dytë 2022, bankat kanë rritur kredinë për apartamemnte, ndërkohë që rritje të konsiderueshme kanë shënuar depozitat në valutë. Sipas të dhënave zyrtare të Bankës së Shqipërisë, bankat kanë dhënë rreth 140 miliardë lekë kredi të re. Kjo vlerë ishte diçka më shumë sesa kredia e dhënë gjatë gjysmës së parë të vitit 2022, por disi më pak në krahasim me të njëjtën periudhë të vitit 2021. Për bizneset, kredia e re është akorduar për të përmbushur kërkesat e tyre afatshkurtra për likuiditet.

Kredia e re për individët gjatë vitit të fundit është përdorur kryesisht për blerje banesash dhe konsum të mallrave jo të qëndrueshëm, dhe është dhënë kryesisht në valutë. Norma mesatare e peshuar e interesit për kredinë e re të dhënë gjatë periudhës ka shënuar rritje, dhe kjo rritje është vënë re tek të gjitha kategoritë e kredisë së re. Midis kategorive të ndryshme, rritja e normave të interesit ka qenë relativisht më e ulët tek kreditë për blerje pasurish të paluajtshme në lekë dhe në valutë.

Depozitat bankare u ngjitën në 1,5 trilionë lekë, duke u zgjeruar me 4% gjatë periudhës. Rritja më e fortë u regjistrua në depozitat e individëve, ato në valutë dhe llogaritë rrjedhëse. Në krahasim me 2-3 vitet e mëparshme, rritja vjetore e depozitave u ngadalësua. Zhvillim i rëndësishëm për periudhën ishte rritja e fortë e depozitave me afat në valutë. Normat e interesit për të gjitha llojet e depozitave të reja sipas afatit, sektorit dhe monedhës mbeten në nivele relativisht të ulëta, por kanë shënuar rritje gjatë gjysmës së dytë të vitit 2022.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.