DIHA takim në Tiranë – Ambasadori gjerman Bergner vlerëson zhvillimin pozitiv ekonomik të Shqipërisë

Shoqata Gjermane e Industrisë dhe Tregtisë në Shqipëri (DIHA) organizoi pritjen e saj të përvitshme në Ambasadën Gjermane, me pjesëmarrës të shumtë mes të cilëve përfaqësues nga kompani anëtare, organizata ndërkombëtare, përfaqësues të Ambasadës Gjermane në Tiranë, si dhe aktorë të rëndësishëm të politikës shqiptare. Aktiviteti nisi me fjalën hyrëse të ambasadorit gjerman në Shqipëri, Karl Bergner, i cili shprehu falenderimin për DIHA-n dhe të gjithë të pranishmit për angazhimin e tyre të vazhdueshëm.

Ambasadori Bergner theksoi marrëdhëniet e forta midis Gjermanisë dhe Shqipërisë, duke premtuar partneritetin e palëkundur të Gjermanisë në rrugëtimin e Shqipërisë drejt zhvillimit ekonomik dhe integrimit në Bashkimin Evropian. Ai u angazhua për mbështetjen e mëtejshme të këtyre marrëdhënieve dhe nënvizoi rëndësinë e investimeve të vazhdueshme si një element thelbësor për zhvillimin ekonomik.

Ambasadori Bergner shprehu vlerësimin e tij për zhvillimin pozitiv ekonomik të Shqipërisë vitin e shkuar, pavarësisht kushteve të vështira.

Ai theksoi rëndësinë e progresit të mëtejshëm në procesin e anëtarësimit të Shqipërisë në BE , të cilin Gjermania e mbështet fuqishëm.

“Gjermania gjithashtu do të vazhdojë të mbështesë reformat e mëtejshme në fushën e sundimit të ligjit dhe në promovimin e rritjes së qëndrueshme, ndër të tjera nëpërmjet masave të Bashkëpunimit Ekonomik gjerman”, tha Bergner.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.