“Duhet të pendohemi për Brexit”! – Deklarata e fortë e kryebashkiakut të Londrës, Sadik Khan
Një sulm i hapur ai i kryebashkiakut laburist të Londrës Sadik Khan, për Brexit. 2 vjet pas hyrjes përfundimtare në fuqi të divorcit nga Brukseli, ai akuzon konservatorët se i kanë shkaktuar një dëm shumë të madh vendit. Por ai kritikoi në mënyrë jo të drejtpëdrejtë edhe liderin e partisë së tij, Keir Starmer, duke i kërkuar të rimendohet dhe njëherë për një Brexit më të butë. Ose të paktën për një rikthmi të Mbretërisë së Bashkuar në tregun e përbashkët dhe në unionin doganor europian. Khan propozon nisjen e një debati për këtë temë, një ide e kundërshtuar prerazi nga lideri i partisë së tij.
Khan thekson se pas dy vitesh mohim dhe arratisje nga realiteti, njerëzit duhet të përballen me të vërtetën e hidhur. Me pak fjalë me faktin që Brexit nuk funksionon. Madje sipas tij kjo dëmton ekonominë britanike dhe krijon probleme në tregun e brendshëm. Situatë kjo që ka lëkundur reputacionin e vendit.
Sondazhet më të fundit më vend tregojnë se britanikët po zhgënjehen gjithnjë e më shumë nga rezultatet dhe premtimet e paplotësuara të Brexit, në një situatë aktuale të përkeqësuar nga kriza globale.
Madje disa media britanike kanë nisur të përdorin termin “Bregret”: një bashkim i Brexit dhe fjalës pendim në anglisht.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.