Europa përdor kursimet si “armë” kryesore – Depozitat në Eurozonë arrijnë në 8.4 trilionë euro

Qeveritë e vendeve anëtare të Bashkimit Europian vlerësojnë se pasuria e familjeve e investuar ose në aksione vendase ose në obligacione mund të mbyllë hendekun në rritje dhe produktivitet me SHBA-në dhe Kinën, sipas një sondazhi të Reuters. Në Francë, krijimi i një mjeti kursimi pan-europian është bërë temë kryesore e një debati publik, ndërsa në Britani qeveria Sunak ofron përjashtime nga taksat për të gjithë ata që vendosin fondet e tyre në aksione të kompanive britanike.

Megjithatë, ka edhe zëra që vënë në dukje dobësitë e këtij projekti. Një nga argumentet e tyre është se skema të tilla rrezikojnë të zhgënjejnë kursimtarët. Përveç kësaj, ata konsiderojnë se nuk korrigjojnë dobësitë e rrënjosura të modelit ekonomik europian, që ata mendojnë se pengojnë investimet.

Europianët kanë më shumë kapital në kursime sesa amerikanët, dhe hendeku është zgjeruar pasi ata ndihen më të pasigurtë pas luftës në Ukrainë. Kursimet në eurozonë arrijnë në 8.4 trilionë euro. Ministri i Financave i Francës, Bruno Le Maire, i cilësoi si para që “flenë” dhe nuk kontribuojnë në prosperitet dhe propozoi hartimin e një produkti kursimi pan-europian. Në të njëjtën kohë, ka një propozim nga ligjvënësit francezë që kursimet të kanalizohen në kompanitë vendase të mbrojtjes përmes depozitave të garantuara nga shteti.

Sektori bankar është një pikë shqetësuese, pasi depozitat janë një burim jetik financimi për institucionet e kreditit dhe për këtë arsye një numër ekonomistësh janë kundër kësaj ideje.

Kompanitë europiane për një dekadë e kanë vendosur financimin shumë të ulët në listën e problemeve të tyre, sipas të dhënave nga Komisioni Europian dhe Banka Qendrore Europiane, dhe përfitimi i tij mund të financojë investimet e tyre.

Vetë disa qeveri marrin hua direkt nga qytetarët. Obligacionet private të Italisë kanë mbledhur 53.7 miliardë euro që nga qershori. Ndërsa Britania njoftoi bono të reja kursimi sipas shembullit të Belgjikës dhe Greqisë. Avantazhi kryesor i investitorëve privatë me kapital më të ulët – investitorët me pakicë – është se ata janë më pak të paqëndrueshëm se profesionistët dhe kanë më shumë gjasa të mbajnë obligacionet deri në maturim, sepse nuk duhet të shqetësohen për kthimin e tyre tremujor.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.