“Thembra e Akilit” e Emmanuel Macron – Rritja e deficitit buxhetor në 5.5% të PBB-së, goditje për imazhin reformist

Deficiti buxhetor i Francës po del jashtë kontrollit, duke minuar besueshmërinë e presidentit Macron si një reformator ekonomik. Sipas zyrës së statistikave, hendeku midis të ardhurave dhe shpenzimeve u zgjerua në 5.5% të PBB-së vitin e kaluar nga 4.8% në 2022, ndërsa vlerësimet zyrtare e donin atë në 4.9%. Rritja e të ardhurave tatimore u ngadalësua ndjeshëm pasi ekonomia franceze u ndal, ndërsa rritja e shpenzimeve u ngadalësua lehtë.

Deficiti buxhetor në rritje është një goditje për Macron, i cili që nga marrja e detyrës në 2017-ën ka çimentuar reputacionin e tij për disiplinën fiskale në ndryshim nga vitet e mëparshme. Në mandatin e tij të parë ka përmirësuar deficitin, ose e ka harmonizuar me objektivin në katër raste, ndërsa në një ka pasur rrëshqitje për shkak të pandemisë. Aktualisht, shkalla e devijimit të vitit 2023 vë në pikëpyetje strategjinë e Macron-it për rimëkëmbjen graduale fiskale, duke u mbështetur në rishikimet që promovonin rritjen, të tilla si lehtësimi i ligjeve të punës ose rritja e moshës së daljes në pension.

Një zhvendosje në rritjen e taksave, të cilën qeveria e kundërshton, ose shkurtimet më drastike të shpenzimeve, do të ishin të rrezikshme. Partia e Emmanuel Macron tashmë është pas ekstremit të djathtë të Marine Le Pen me rreth 10 pikë në sondazhet e opinionit përpara zgjedhjeve europiane. Përveç kësaj, Macron ka premtuar të ulë taksat për pagat e ulëta në vitin 2025. Ministria e financave njoftoi tashmë 10 miliardë euro kursime në shkurt për t’u rikthyer në rrugën e duhur për të përmbushur objektivin e deficitit prej 4.4 % të PBB-së këtë vit. Të paktën 20 miliardë euro të tjera do të kërkohen gjithashtu nga buxheti i vitit 2025.

Bruno Le Maire, ministër i Financave, synon të ulë deficitin nën 3% të PBB që është kufiri tavan i BE-së në tre vjet, kur përfundon presidenca e Macron. Disa nga aleatët, i kanë bërë thirrje presidentit që të braktisë filozofinë e mosrritjes së taksave që ka ndihmuar në nxitjen e investimeve të huaja në Francë. Le Maire tha se ishte i hapur ndaj taksave më të ashpra për fitimet e papritura të kompanive të energjisë, por përsëriti se qeveria kundërshton çdo rritje të taksave.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.