Fermerët polakë bllokojnë kufirin e Ukrainës duke protestuar ndaj importeve jashtë BE-së!

Fermerët polakë bllokuan kalimet kufitare me Ukrainën, dogjën goma dhe derdhën grurë nga vagonët e trenave të martën, ndërsa intensifikuan një protestë mbarëkombëtare kundër importit të ushqimeve ukrainase dhe politikave mjedisore të Bashkimit Europian.

Fermerët nga Spanja në Itali dhe Belgjikë kanë protestuar kohët e fundit, të shqetësuar se planet e BE-së për të vendosur kufizime në përdorimin e kimikateve dhe në emetimet e gazrave serrë do të rezultojnë në një reduktim të prodhimit dhe të ardhurave. Ata janë gjithashtu të revoltuar ndaj konkurrencës nga vendet jo anëtare të BE-së, veçanërisht Ukraina, një prodhues i madh i mallrave bujqësore.

Fermerët polakë mbajtën protesta në më shumë se 180 vende, duke bllokuar rrugët e hyrjes në pikat kufitare me Ukrainën. Ata lëviznin me traktorë nëpër kryqëzime dhe hyrje-dalje të autostradave pranë qyteteve duke përfshirë Varshavën, Poznanin dhe Wroclaw.

Protestat janë një burim në rritje tensionesh midis Ukrainës dhe fqinjëve përtej kufirit të saj perëndimor, të cilët mbështesin përpjekjet e saj për të luftuar pushtimin e Rusisë, por po përballen me presionin nga fermerët të cilët thonë se importet e grurit dhe ushqimeve të tjera ukrainase po dëmtojnë jetesën e tyre duke krijuar një tepri në treg që ul çmimet.

Presidenti i Ukrainës, Volodymyr Zelenskyy, veçoi fermerët polakë protestues në fjalimin e tij të natës të hënën, duke thënë se veprimet e tyre treguan një “erozion të solidaritetit”.

“Afër Kupiansk, afër kufirit rus, ku artileria e armikut nuk pushon, lajmet nga kufiri me Poloninë duken krejtësisht tallëse,” tha Zelenskyy.

Më shumë protesta priten të enjten në Europën Qendrore dhe Lindore. Fermerët ankohen se politikat e 27 vendeve të BE-së për mjedisin dhe çështje të tjera janë një barrë financiare dhe i bëjnë produktet e tyre më të shtrenjta se importet jashtë BE-së.

​Edel Strazimiri / SCAN

​

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.