Gjeorgjia “shijon” rritjen rekord të ekonomisë – Vendi fqinj me Rusinë ka pritur mbi 100 mijë rusë që nga fillimi i luftës

Gjeorgjia mund të konsiderohet në rrugën e duhur për t’u bërë një nga ekonomitë me rritjen më të shpejtë në botë këtë vit, pas një fluksi prej më shumë se 100 mijë rusësh që nga pushtimi i Ukrainës nga Moska.

Në një moment që pjesa më e madhe e globit shkon drejt recesionit, ky vend me 3.7 milionë banorë në kufi me Detin e Zi pritet të shënojë një rritje të fuqishme prej 10% të Prodhimit të Brendshëm Bruto për vitin 2022, në mes të shifrave rekord që vijnë nga konsumi, të konfirmuara nga institucionet ndërkombëtare.

Kjo do të bënte që ekonomia modeste prej 19 miliardë dollarësh, e njohur në rajon për malet, pyjet dhe luginat me vreshta, të tejkalojë tregjet në zhvillim si ai i Vietnamit dhe eksportuesit e naftës si Kuvajti, nxitur nga cmimet e larta të naftës së papërpunuar.

Administratori i Përgjithshëm i bankës më të madhe në vend “TBC” shprehet se nga ana ekonomike Gjeorgjia po ecën shumë mirë. Ai shtoi se ka një zhvillim të papritur dhe se të gjitha industritë po ecin shumë mirë nga ato mikro e deri tek korporatat.

Të paktën 112 mijë rusë kanë emigruar në Gjeorgji gjatë këtij viti, sipas statistikave zyrtare. Një valë e madhe prej 43 mijë banorësh mbërriti pasi Rusia pushtoi Ukrainën në 24 shkurt. Ndërsa vala e dytë u regjistrua pasi Putin njoftoi mobilizimin e detyruar mbarëkombëtar në fund të shtatorit.

Zhvillimi i papritur ekonomik i Gjeorgjisë, ka surprizuar shumë ekspertë që analizojnë aktualisht pasoja të tmerrshme nga lufta për ish-republikën sovjetike, pasuritë e të cilës janë të lidhura ngushtë me fqinjin e saj më të madh përmes eksporteve dhe turistëve.

Banka Europiane pë Rindërtim dhe Zhvillim – BERZH – parashikoi në muajin mars të këtij viti se konflikti në Ukrainë do t’i jepte një goditje të madhe ekonomisë gjeorgjiane. Po kështu Banka Botërore parashikoi në muajin prill se rritja ekonomike për vendit do të binte në 2.5%, nga 5.5% që ishte parashikuar fillimisht.

Por ekonomistët paralajmërojnë se ky zhvillimi mund të mos zgjasë dhe inkurajojnë qeverinë gjeorgjiane të përdorë të ardhurat e shtuara tatimore për të shlyer borxhin dhe për të krijuar sa më shumë rezerva valutore.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.