Gjermania nis javën e punës me 4 ditë – Në përpjekje për të ringjallur ekonominë e “sëmurë”

Lufta e Gjermanisë për të ringjallur ekonominë e saj të ngadaltë është gati të marrë një kthesë eksperimentale pasi shumë kompani testojnë përfitimet javës me më pak ditë pune. Një program gjashtëmujor që fillon më 1 shkurt do t’u japë qindra punonjësve një ditë më shumë pushim çdo javë duke i mbajtur ata me pagë të plotë. Studimi synon të zbulojë nëse sindikatat kanë të drejtë kur thonë se një vendim i tillë jo vetëm mund ta bëjë stafin më të shëndetshëm dhe më të lumtur, por edhe më produktiv.

Projekti nënvizon një ndryshim më të gjerë që po ndodh në tregun gjerman të punës, ku mungesa e punëtorëve të kualifikuar po ushtron presion mbi kompanitë për të plotësuar vendet e lira të punës. Mungesa – e kombinuar me inflacionin e lartë – ka inkurajuar punëtorët në të gjitha industritë që të kërkojnë rritje të pagave dhe të ruajnë fleksibilitetin dhe pavarësinë që fituan gjatë pandemisë.

Drejtuesit e trenave në Gjermani janë aktualisht në një grevë gjashtë-ditore, duke kërkuar që Deutsche Bahn të reduktojë javën e punës në 35 orë nga 38 orë pa asnjë ulje page. Sindikata e ndërtimit të vendit po kërkon një rritje pagash prej më shumë se 20 % për shumë prej 930.000 punëtorëve të saj – një lëvizje që disa ekonomistë paralajmërojnë se mund të nxisë inflacionin.

Sipas një sondazhi të lobit të industrisë vitin e kaluar, gjysma e kompanive gjermane të paktën pjesërisht nuk janë në gjendje të plotësojnë vendet e lira të punës. Dhe problemi do të përkeqësohet: më shumë se 7 milionë njerëz pritet të largohen nga fuqia punëtore gjermane deri në vitin 2035, pasi nivelet e lindjeve dhe imigrimi janë shumë më pak se ajo që nevojitet për të zëvendësuar popullsinë në plakje.

Dhe punëtorët e pakënaqur kanë një çmim të lartë. Sipas një studimi të fundit të Gallup, angazhimi i ulët i kushtoi ekonomisë globale 8.1 trilion euro vitin e kaluar. Kjo është 9% e prodhimit të brendshëm bruto global. Mesatarja prej 21.3 ditësh që gjermanët nuk ishin në gjendje të punonin në vitin 2022 nënkuptonte një humbje prej 207 miliardë euro në vlerë të shtuar, sipas Institutit Federal për Sigurinë dhe Shëndetin në Punë.

Mbështetësit e javës katër-ditore argumentojnë gjithashtu se ajo mund të tërheqë potencial të pashfrytëzuar në tregun e punës në Gjermani – një vend që ka një nga normat më të larta të punës me kohë të pjesshme në BE, sipas Eurostat. Ndërsa Gjermania ka deri tani produktivitetin më të madh ekonomik në Europë, mungesa e investimeve në inovacion dhe dixhitalizim ka penguar përfitimet e produktivitetit.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.