Gjermania premton rritje të pagës minimale – Deri në vitin 2025 do të bëhet 12.82 euro në orë

Një komision i caktuar nga qeveria gjermane propozoi rritjen e pagës minimale në 12.41 euro në orë nga viti 2024 dhe në 12.82 euro nga janari 2025, megjithëse analistët thanë se rritja nuk ishte e mjaftueshme për të kompensuar inflacionin.

Rritja e pagës minimale, e cila shkoi në 12 euro në orë në tetor nga 10.45, ishte një nga premtimet kryesore zgjedhore të kancelarit Olaf Scholz dhe socialdemokratëve të tij. Një rritje ka të ngjarë të prekë drejtpërdrejt pothuajse 6 milionë punonjës në Gjermani.

Vendi ka pagën minimale të dytë më të lartë në Bashkimin Europian pas Luksemburgut, i cili ka caktuar një minimum mujor prej 2.387 euro. Nëse rritja e propozuar në Gjermani miratohet, ekonomia më e madhe e eurozonës do të shihte punëtorët të fitonin të paktën 2054 euro në muaj.

Vetëm gjashtë vende të BE-së kanë një pagë minimale kombëtare mbi 1.500 euro në muaj, duke përfshirë Luksemburgun, Gjermaninë, Belgjikën, Holandën, Irlandën dhe Francën, sipas të dhënave të Eurostat.

Rritjet e inflacionit dhe normave të interesit nga Banka Qendrore Europiane kanë ulur ndjeshëm fuqinë blerëse të njerëzve në ekonominë më të madhe të Europës. Edhe situata e fitimeve të biznesit ka qenë në rënie.

Komisioni për pagën minimale përbëhet nga përfaqësues të punëdhënësve dhe sindikatave. Për herë të parë propozimi i saj nuk u bë me konsensus unanim por me shumicë votash.

Propozimi ende duhet të miratohet nga Ministri gjerman i Punës Hubertus Heil. Punëdhënësit folën për një mjedis të vështirë, ndërsa përfaqësuesit e sindikatave theksuan se rezultati nuk ishte i kënaqshëm. Aktualisht bëhet fjalë vetëm një rritje prej 3.4% dhe më pas 3.3%, që do të thotë dy vite humbje reale të pagave.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.