Gjermania, prodhuesi numër 1 i çipave në Europë – Një kompani tajvaneze do të investojë 3,5 mld euro për ngritjen e një fabrike

Gjermania mund të bëhet një qendër e madhe europiane e prodhimit të çipave, deklaroi kancelari Olaf Scholz, pasi kompania TSMC ishte prodhuesi më i fundit i gjysmëpërçuesve që njoftoi investimet në vend.

“Ky vendim është i rëndësishëm për qendrueshmërinë e strukturave prodhuese në të gjithë botën, por është gjithashtu i rëndësishëme për qendrueshmërinë e kontinentit tonë europian dhe të Gjermanisë,” tha Scholz.

Prodhuesi tajvanez i çipave TSMC njoftoi një investim prej 3.5 miliardë euro për ngritjen e një fabrike në Gjermani, e para e saj në Europë, duke përfituar nga mbështetja e madhe shtetërore për uzinën prodhuese.

Fabrika, e cila do të jetë e treta e TSMC jashtë bazave tradicionale të prodhimit në Tajvan dhe Kinë, është thelbësore për ambicien e Berlinit për të nxitur industrinë vendase të gjysmëpërçuesve. Kështu, industria e saj e makinave do të mbetet konkurruese globalisht.

Bashkimi Europian ka miratuar Aktin Europian të Çipave, një plan subvencioni prej 43 miliardë euro për të dyfishuar kapacitetin e tij të prodhimit deri në vitin 2030, në një përpjekje për të kapur hapin me Azinë dhe Shtetet e Bashkuara pas mungesës dhe çmimeve të larta gjatë pandemisë COVID-19.

Qeveria gjermane do të kontribuojë deri në 5 miliardë euro për ngritjen e fabrikës në Dresden, kryeqyteti i Landit të Saksonisë, që është qendra e industrisë elektronike të ish-Gjermanisë Lindore.

Kompania TSMC është investimi i vetëm më i madh në historinë e Saksonisë dhe një nxitje për kryeministrin konservator të Landit, i cili përballet me një sfidë të fortë nga partia e ekstremit të djathtë, Alternativa për Gjermaninë, kundër emigracionit, përpara zgjedhjeve rajonale të vitit të ardhshëm.

Ministri gjerman i Ekonomisë, Robert Habeck, e përshëndeti investimin si një votë besimi në një ekonomi që është goditur nga çmimet e larta të energjisë pas pushtimit rus të Ukrainës, i cili shkaktoi një ngadalësim dhe frikën se fuqia ekonomike e Europës mund të deindustrializohet.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.