Greva më e gjatë në historinë e Britanisë – Dhjetëra mijëra mjekë kërkojnë rritje page

Në Britaninë e Madhe ka nisur greva më e gjatë në historinë e vendit, për sa i përket sektorit të shëndetësisë. Për pesë ditë dhjetëra mijëra mjekë do të refuzojnë cdo shërbim duke kërkuar rritje  të menjëhershme të pagave me 35%.

Në Britaninë e Madhe mjekët e rinj, të cilët janë në fillim të karrierës së tyre, janë në grevë së bashku me Shoqatën Mjekësore Britanike dhe sindikatën e mjekëve, duke kërkuar një rritje pagash prej 35 % për të rikthyer pagat në nivelet e vitit 2008, duke marrë parasysh inflacionin.

Ndërkohë, rreth 75 mijë mjekë të rinj në Angli kanë më shumë punë për të bërë pasi listat e pritjes së pacientëve janë në nivele rekord pas pandemisë së koronavirusit.

Sipas tyre ky vendim shënon fillimin e grevës më të gjatë të mjekëve në historinë e sistemit britanik të shëndetësisë, por ky nuk është ende një rekord që do të hyjë në histori. Ata i bënë thirrje qeverisë të heqë dorë nga “parakushti i pakuptimtë” se nuk do të negociojë ndërkohë që grevat vazhdojnë.

Pavarësisht nga një seri grevash nga punonjësit publikë në shumë sektorë, qeveria britanike po qëndron e palëkundur në pozicionin e saj se nuk do të negociojë sipas kushteve të ndalimit të punës.

Ministri britanik i shëndetësisë u shpreh se kjo grevë pesë ditore e mjekëve të rinj do të ndikojë te mijëra pacientë, do të kërcënojë sigurinë e tyre dhe do të zhgënjejë përpjekjet për të reduktuar listat e pritjes. Sipas tij kërkesa për rritje pagash prej 35 % ose më shumë është e paarsyeshme dhe rrezikon të nxisë inflacionin, duke i bërë të gjithë më të varfër.

Britania, si vendet e tjera, po lufton me inflacionin e lartë. Rritja e çmimeve u nxit nga problemet në zinxhirin e furnizimit si pasojë e pandemisë, dhe më pas nga pushtimi rus i Ukrainës, i cili shkaktoi rritjen e çmimeve të energjisë dhe ushqimeve.

Megjithëse inflacioni ka rënë pak nga kulmi i tij në 8.7 %, ai është ende shumë mbi nivelin prej dy për qind të vendosur si objektiv nga Banka e Anglisë.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.