“Hetimi i BE dëmton marrëdhëniet ekonomiko-tregtare” – Pekini reagon ndaj vendimit të një dite më parë nga Brukseli
Pekini e cilësoi nisjen e një hetimi nga Komisioni Europian për subvencionet e automjeteve elektrike të Kinës si proteksioniste dhe paralajmëroi se do të ndikonte negativisht në marrëdhëniet ekonomike dhe tregtare, pasi aksionet e prodhuesve kinezë të automjeteve elektrike ranë.
Presidentja e Komisionit Europian Ursula von der Leyen konfirmoi nisjen e hetimeve, duke akuzuar Kinën për vërshimin e tregjeve globale me automjete elektrike që kishin çmime artificialisht të ulëta për shkak të subvencioneve të mëdha shtetërore.
Hetimi, i cili mund të rezultojë në tarifa ndëshkuese, ka nxitur paralajmërimet e analistëve për veprime hakmarrëse nga Pekini, si dhe kundërpërgjigje nga drejtuesit e industrisë kineze, të cilët thonë se avantazhi konkurrues i sektorit nuk ishte për shkak të subvencioneve.
Ministria kineze e tregtisë në një deklaratë për media theksoi se hetimi në fjalë është një akt i qartë proteksionist që do të prishë dhe shtrembërojë seriozisht industrinë globale të automjeteve si dhe zinxhirin e furnizimit, duke përfshirë BE-në, dhe do të ketë një ndikim negativ në marrëdhëniet ekonomike dhe tregtare Kinë-BE. Më tej shkruhet se Kina do t’i kushtojë vëmendje tendencave proteksioniste të BE-së dhe veprimeve pasuese, dhe do të mbrojë me vendosmëri të drejtat dhe interesat legjitime të kompanive kineze.
Analistët e Grupit Eurasian paralajmëruan se nëse Brukseli përfundimisht vendos ‘kushte’ ndaj automjeteve të subvencionuara kineze, Pekini ka të ngjarë të kundërveprojë për të dëmtuar industritë europiane.
Analistë të tjerë thanë se situata e krijuar mund të ngadalësojë zgjerimin e kapacitetit nga furnizuesit e baterive të Kinës, megjithëse masa nuk duhet të përbëjë një rrezik të madh negativ për prodhuesit kinezë të automjeteve elektrike, sepse ata mund të drejtohen nga tregje të tjera në rritje si Azia Juglindore.
Megjithatë, kjo mund të dëmtojë perceptimet e prodhuesve kinezë të automjeteve elektrike ndërsa zgjerohen jashtë vendit, sipas analistëve të Bernstein. Prodhuesit kanë përshpejtuar përpjekjet për eksport pasi ngadalësimi i kërkesës së konsumatorëve në Kinë përkeqëson mbikapacitetin e prodhimit.
Zyrtarët e BE-së besojnë se automjetet elektrike kineze po ulin çmimet e modeleve vendase me rreth 20% në tregun europian, duke shtuar presionin ndaj orodhuesve europianë të automjeteve për të prodhuar automjete elektrike me kosto më të ulët.
Komisioni Europian tha se pjesa e Kinës e automjeteve elektrike të shitura në Europë është rritur në 8% dhe mund të arrijë në 15% në 2025 – ën. Në vitin 2022, 35% e të gjitha autpomjeteve elektrike të eksportuara e kishin origjinën nga Kina, 10 pikë përqindje më e lartë se një vit më parë. Shumica e automjeteve dhe bateritë me të cilat furnizohen, ishin të destinuara për në Europë, ku 16% e baterive dhe automjeteve të shitura ishin prodhuar në Kinë në vitin 2022.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.