Kafeja “mall i ndaluar” për japonezët?! – Zhvlerësimi i jenit po rrit çmimet. Vitin e kaluar, Japonia konsumoi rreth 420 mijë ton
Industria japoneze e kafesë, e cila ende po ndjen pasojat e COVID-19, tani po përballet me sfida të reja të shkaktuara nga zhvlerësimi i monedhës së vendit. Vitin e kaluar, Japonia konsumoi rreth 420,000 ton kafe. Megjithatë, zakonet e konsumit të kafesë të japonezëve mund të ndryshojnë, pasi çmimet e produkteve të ndryshme të kafesë pritet të rriten më tej me kursin e këmbimit të jenit ndaj dollarit amerikan që po dobësohet vazhdimisht në 148 jen, një nivel i ri i ulët në 32 vjet.
Zhvlerësimi i jenit ka goditur shumë industri në Japoni që mbështeten në importin e lëndëve të para, duke përfshirë industrinë e kafesë.
Në Japoni, kafeja është bërë një nga pijet e përditshme. Çdo japonez tani pi mesatarisht 11.5 filxhanë kafe në javë. Duke qenë se kokrrat e kafesë janë pothuajse të gjitha të importuara, zhvlerësimi i shpejtë i jenit ka dhënë një goditje në kafenetë.
Menaxheri i një kafeneje në Tokio, e cila funksionon prej 73 vitesh, tha se ata përdorin mesatarisht rreth 15 kilogramë kokrra kafeje çdo javë, shumica e të cilave importohen nga Brazili dhe Kolumbia.
Për shkak të rënies së prodhimit nga kushtet e pafavorshme klimatike në origjinë dhe zhvlerësimi i jenit, çmimet e blerjes së kokrrave të kafesë janë rritur me 20 deri në 30% krahasuar me vitin e kaluar.
“Ne aktualisht mbështetemi në lloje të tjera pijesh për të mbajtur lokalin hapur, por do të na duhet të rrisim çmimet e kafesë, nëse ato të importit do të vijojnë të rriten,” tha menaxheri i lokalit, Maiko Shinozaki.
Jo vetëm kafenetë private janë goditur nga zhvlerësimi i jenit, por edhe supermarketet, që kanë rritur çmimin e kafesë së sapo bluar deri në 20%.
Së fundmi, Festivali i Kafesë në Tokyo, një nga ekspozitat më të mëdha në Azi, është hapur për herë të parë në tre vjet, duke tërhequr rreth 200 biznese nga 40 vende. Zhvlerësimi i shpejtë i jenit është bërë një temë e nxehtë për ekspozuesit. Disa importues thanë se duke qenë se zhvlerësimi i shpejtë i jenit ka rritur çmimet e importit, ata duhej të vazhdonin të rrisnin çmimet. Ndërkohë, disa thanë se po përpiqen të ulin kostot në mënyra të tjera.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.