Kërkesë shumë e lartë nga individët, bien përsëri bonot – Tkurrje e ndjeshme në maj, si në instrumentet më afat maturimi 12-mujor, edhe 3-mujor

Bonot e thesarit kanë thelluar javën e fundit të majit tendencën rënëse të shfaqur gjatë gjithë këtij viti, pavarësisht rritjes së normës bazë të interesit nga Banka e Shqipërisë në muajin mars. Në ankandin e kësaj jave, yieldi mesatar i ponderuar i bonove të thesarit me afat maturimi 12-mujor ra në 3,44%, pranë vlerave që nuk shënoheshin që nga vera e vitit të shkuar. Në ankandin e mesit të majit, yieldi mesatar i ponderuar ishte 3.56%, ndërkohë që rënia është pak a shumë e njëjtrajtshme krahasuar me ankandet e mëparëshëm.

Edhe në ankandin e fundit të majit, kërkesa për të investuar në këtë instrument, veccanërisht nga individët, ka qenë shumë e lartë. Ministria e Financave ka emetuar një total prej 7.5 miliardë lekësh, apo afërisht 70 milionë euro, ndërkohë që totali i vënë në dispozicion nga investitorët ishte rreth 100 milionë euro. Edhe më i thellë ka qenë raporti kërkesë ofertë gjatë ankandeve të mëparëshme, ku prania e individëve ka qenë edhe më e madhe. Në të dy ankandet qeveria ka emetuar rreth 9 miliardë, ndërkohë që shuma totale e vënë në dispozicion nga investitorët ka qenë rreth 14 miliardë.

Ndërkohë që rënia e yieldeve është shtrirë te të gjitha maturitetet. Në po të njëjtin ankand, bonot e thesarit me afat maturimi gjashtë mujor kanë rënë në 3.18%, nga 3.26% në fundin e shkurtit. Rënia e yield-eve, e nisur fillimisht tek bonot 12-mujore në muajin dhjetor të vitit të kaluar, është forcuar dhe është shtrirë më pas tek të gjitha maturitetet. Diferencat e yield-it të bonove me normën bazë dhe ajo mes yield-eve maksimale dhe minimale të regjistruara në ankande janë ngushtuar, duke konfirmuar kështu presionet rënëse.

Edhe yield-et e obligacioneve kanë shfaqur ecuri të njëjtë me bonot në këtë periudhë, ku uljet e realizuara tek maturitetet afatgjata kanë rezultuar shpesh më të forta se ato të bonove të thesarit. Yield-i i obligacionit 2-vjeçar shënoi 4.3% në muajin prill, nga 5.8% në muajin janar, ndërkohë që yield-et e obligacioneve 5, 7, 10, dhe 15-vjeçare u ulën mesatarisht me 2 pikë përqindjeje nga ankandet e fundit respektive.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.