Kina kalon Japoninë si eksportuesi kryesor i makinave në botë!

Kina thotë se është bërë eksportuesi më i madh në botë i makinave pasi ka kaluar Japoninë në tre muajt e parë të vitit. Shifrat zyrtare të publikuara javën e kaluar tregojnë se Kina eksportoi 1.07 milionë automjete në këtë periudhë, 58% më shumë krahasuar me tremujorin e parë të 2022.

Në të njëjtën kohë, eksportet e automjeteve të Japonisë qëndruan në 954,185, pasi u rritën me 6% nga një vit më parë. Eksportet e Kinës u rritën nga kërkesa për makina elektrike dhe shitjet në Rusi.

Vitin e kaluar, Kina kaloi Gjermaninë duke u bërë eksportuesi i dytë më i madh i makinave në botë. Sipas Administratës së Përgjithshme të Doganave të Kinës, Kina eksportoi 3.2 milionë automjete në vitin 2022, krahasuar me 2.6 milionë eksporte të automjeteve të Gjermanisë.

Zhvendosja nga karburantet fosile ka ndihmuar në rritjen e industrisë motorike të Kinës. Eksportet e tremujorit të parë të automjeteve me energji të reja (NEV), ku përfshihen makinat elektrike, u rritën me më shumë se 90%, krahasuar me një vit më parë.

Krahu i Tesla-s në Kinë, SAIC – pronari i markës MG – dhe BYD, i cili mbështetet nga investitori veteran amerikan Warren Buffett, janë ndër eksportuesit kryesorë të Kinës të NEV-ve. Prodhuesi i makinave elektrike të Elon Musk ka një fabrikë të madhe prodhimi në Shangai, e cila eksporton në rajone duke përfshirë Japoninë dhe Europën.

‘Gigafactory’ e Tesla-s aktualisht është në gjendje të prodhojë 1.25 milionë automjete në vit dhe kompania po planifikon të rrisë më tej kapacitetin. Muajin e kaluar, ajo filloi të prodhojë automjete sportive Model Y për eksport në Kanada.

Kina ka parë gjithashtu rritje të eksporteve në Rusi që nga fillimi i luftës në Ukrainë, pasi vendet perëndimore vendosën sanksione tregtare ndaj Moskës.

Vitin e kaluar, prodhuesit kinezë të makinave – duke përfshirë Geely, Chery dhe Great Wall – panë pjesën e tyre të tregut në Rusi të rritej pasi rivalët duke përfshirë Volkswagen dhe Toyota u larguan nga vendi pas pushtimit të Ukrainës.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.