Kriza prek Goldman Sachs, pushon 4 mijë punonjës – Eliminon shpërblimet vjetore për ata me performancë të dobët

Goldman Sachs Group po planifikon të pushojë rreth 4 mijë punonjës, si pasojë e rënies së numrit të marrëveshjeve këtë vit. Banka do të jetë më e dobët në vitin 2023, por do të ketë akoma më shumë punonjës se para pandemisë. Goldman kishte rreth 49 mijë të punësuar në muajin shtator nga rreth 38 mijë në fund të 2019-ës.

Goldman gjithashtu pritet të reduktojë, dhe në disa raste të eliminojë, shpërblimet vjetore të punonjësve me performacë të dobët.

Njësoj si bankat e tjera të Wall Street, Goldman punësoi në mënyrë agresive përgjatë 2020-ës dhe 2021-shit, duke sjellë shumë punonjës të rinj për të ndihmuar në rimëkëmbjen e grupit. Por ky vit tregoi një histori ndryshe: ngadalësim ekonomik, lufta në Europë dhe rritja e normave të interesit shkaktuan një treg të rënduar për aksionet dhe një rënie në numrin e marrëveshjeve të arritura. Morgan Stanley gjithashtu pushoi nga puna shumë persona këtë muaj. Shkurtime të ngjashme kanë përfshirë kompanitë të tjera amerikane.

Disa nga shkurtimet e vendeve të punës në Goldman do të jenë pjesë e rishikimeve vjetore të fuqisë punëtore. Në pjesën më të madhe të kohës, Goldman kryesisht largon performuesit e dobët gjatë atij procesi, por pushimet nga puna u pezulluan gjatë pandemisë.

Heqja e bonuseve është një tjetër veprim që Goldman mund të bëjë për të reduktuar shpenzimet. Ashtu si shumica e punonjësve të Wall Street, stafi i Goldman mori një pjesë të madhe të kompensimit të tyre në pagesa vjetore, lidhur me performancën e tyre dhe të firmës në përgjithësi.

Punonjësit që nuk marrin bonus zakonisht e interpretojnë atë si një ftesë për t’u larguar. Eliminimi i bonuseve për partnerët me pagesë të lartë dhe drejtuesit e tjerë mund t’i japë gjithashtu bankës liri veprimi për të ruajtur kompensimin për bankierët e rinj.

Goldman në tetor njoftoi një riorganizim të bizneseve të saj, pjesë e një shtytjeje për të tërhequr më shumë vëmendjen ndaj bizneseve të saj të menaxhimit të aseteve dhe pasurisë, ku mund të shkurtojë tarifat relativisht të qëndrueshme.

Morgan Stanley në fillim të këtij muaji shkurtoi rreth 2% të fuqisë punëtore të saj globale, ose rreth 1.600 vende pune.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.