Lehtësohen kreditë për bizneset e vogla dhe të mesme – Vrojtimi i BSH: Pritet rritje e kërkesave për hua nga sipërmarrjet

Standardet e kreditimit për bizneset mbetën të pandryshuara në tremujorin e parë të vitit 2024, thuhet në vrojtimin e aktivitetit kreditues të Bankës së Shqipërisë.

Nuk ka ndryshim të standardeve në kreditë për financimin e investimeve dhe në ato për mbulimin e nevojave për likuiditet. Sipas madhësisë së biznesit, standardet u lehtësuan disi për bizneset e vogla e të mesme, që përbëjnë dhe segmentin me numrin më të madh të sipërmarrjeve, ndërkohë që mbetën të pandryshuara për bizneset e mëdha. Lehtësimi i kritereve të kreditimit për bizneset në tremujorin e parë të këtij viti u arrit nga kostot dhe kufizimet më të ulëta nga bilanci.

Ndërkohë mosndryshimi i standardeve për bizneset e mëdha u ndikua veçanërisht nga perceptimi i bankave për rrezik të shtuar lidhur me situatën ekonomike e perspektivën për të, aftësinë paguese të kredimarrësit, apo mbi kolateralin e kërkuar. Po ashtu, edhe toleranca më e ulët e bankave ndaj rrezikut ishte faktor i rëndësishëm në mosndryshimin standardeve të kreditimit për bizneset e mëdha.

Në tremujorin e dytë të këtij viti, standardet e kreditimit priten të lehtësohen disi në segmentin e biznesit të vogël e të mesëm, në kreditë lëvruar me qëllim financimin e investimeve dhe mbulimin e nevojave për likuiditet. Ndërkohë, ato priten të mbeten të pandryshuara në kreditë për bizneset e mëdha.

Kërkesa për kredi nga bizneset do të vijojë të rritet në të gjitha segmentet e madhësisë së biznesit dhe për cdo lloj qëllimi e përdorimi.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.