Problemet e zbatimit të kontratave publike – APP: 3% kanë patur probleme, 7.4% vonesa në shlyerjen e detyrimeve financiare
Rreth 3% e kontratave për punë, mallra apo shërbime kanë patur problematika gjatë zbatimit të tyre. Nga analizimi i të dhënave të formularëve standardë të raportimit të zbatimit të kontratave, të administruar në Agjencinë e Prokurimit Publik gjatë periudhës Janar – Dhjetor 2023, rezulton se janë raportuar problematika për 98 kontrata, nga 3280 raportime të kryera.
Problematikat lidhen me vonesa në përmbushjen e detyrimeve kontraktuale nga ana e operatorëve ekonomikë, por edhe nga probleme të krijuara nga autoritetet kontraktore, sikurse është lirimi i ambienteve, dorëzimi i materialeve të nevojshme për zbatimin e kontratës, etj.
Gjithashtu, nga shqyrtimi i të dhënave të raportuara gjatë zbatimit të kontratës nga autoritet kontraktore, mbi datën e shlyerjes së plotë të detyrimit financiar dhe parashikimin në kontratë për afatin e shlyerjes, rezulton se në rreth 7.4 % të kontratave të raportuara ka patur vonesa në shlyerjen e detyrimeve financiare nga autoritetet kontraktore.
Sipas Agjencisë së Prokurimit Publik, problematika e shlyerjes me vonesë vijon të mbetet, edhe pse APP ka rekomanduar për autoritetet kontraktore që të respektojnë parashikimet e kontratës dhe legjislacionin në fuqi në lidhje me kryerjen e pagesave.
Sipas parashikimeve ligjore institucionet shtetërore duhet të raportojnë pranë Agjencisë së Prokurimit Publik për zbatimin e kontratave për punë, mallra apo shërbime. Raportimi përfshin 2 faza: Raportimi i ndërmjetëm, gjatë fazës së zbatimit dhe raportimi përmbledhës në përfundim të zbatimit të saj.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.