Mallrat e akcizës “thyejnë” rekord në 10 muaj – U zhdoganuan më shumë karburante, kafe, cigare dhe birrë

Zhdoganimi i mallrave të akcizës ka thyer rekorde këtë 10-mujor, për të paktën 3 vitet e fundit. Të dhënat zyrtare tregojnë se në tregun shqiptar për këtë periudhë kanë hyrë më shumë karburante, cigare, kafe dhe birrë. Duket se sezoni i mjaft i mbarë turistik ka ndikuar në kërkesë të lartë për këto mallra dhe detyrimisht në shtimin e zhdoganimeve.

Zëri që mban peshën më të madhe ndër mallrat e akzicës është ai i karburanteve, që gjatë 10-mujorit të këtij viti është regjistruar pothuajse në të njëjtat nivele të vitit 2021, atij të pas pandemisë, pavarësisht, se gjatë këtij viti çmimet në tregun me pakicë kanë njohur rritje. Rekordi i zhdoganimit për karburantet është regjistruar në pikun e sezonit turistik, gjatë muajit gusht me 65,569 ton.

Pothuajse të njëjtën ecuri gjatë tre viteve ka regjistruar edhe importi i kafesë, që këtë vit është thuajse në të njëjtat nivele më atë të 2021-shit. Edhe për këtë produkt, muaji gusht ka shënuar rekordin e zhdoganimeve me pak më shumë se 1 mijë ton.

Në të njëjtën periudhë krahasimore, cigaret kanë shënuar një rritje të lartë të importeve, duke arritur në 2,665 ton në fund të këtij 10-mujori. Ndonëse për këtë produkt çmimet njohin rritje pothuajse nga viti në vit, kërkesa në treg mbetet e lartë. Për duhanin aplikohet një kalendar i caktuar për rritjen progresive të akcizës deri në vitin 2026 që parashikon rritje mesatarisht 250 lekë për kg çdo vit. Ndërkohë, nga 1 janari 2024 kjo rritje do të reflektohet edhe në çmimin final të shitjes me rreth 20-30 lekë. Ndryshe nga dy produktet e mësipërme, muaji shtator ka shënuar rekordin e zhdoganimeve për cigaret me 435 ton.

Përsa i përket birrës, zhdoganimet për këtë produkt janë në nivelet më të larta të viteve të fundit dhe gushti ka shënuar rekordin e importit. Dyfishimi i akcizës së birrës në 710 lekë për hektolitër nga 1 janari 2023 duket se ka favorizuar më shumë importin dhe ka filluar të japë efekte negative për fabrikat e birrës në vend, të cilat u detyruan të rrisnin çmimin e produktit final. Për shkak të çmimit të lartë nga kostove të shtrenjtuara, birra shqiptare po humbet konkurrueshmërinë, ndërsa sasia e blerë nga jashtë po rritet me ritme të larta.

Ndonëse, në sasi zhdoganimet e katër produkteve të mësipërme janë në nivele të larta, nuk mund të thuhet e njëjta gjë për të ardhurat e akcizës në buxhet, që për 10-mujorin rezultuan pak më të ulta nga planifikimi i fillimvitit. Sipas të dhënave zyrtare, në këtë performancë ka ndikuar sidomos zhvlerësimi i madh i euros ndaj lekut.

Nga ana tjetër, niveli shumë i lartë i inflacionit ka detyruar Ministrinë e Financave të ndërhyjë në ligjin aktual të akcizave. Sipas këtij dikasteri, nëse vijohet me formulën aktuale niveli i akcizave nga janari 2024 duhet të rritet +11,5 % dhe nëse edhe në vitet në vijim inflacioni do të rezultojë në nivele mbinormale, indeksimi do ndikojë në rritjen e çmimeve të mallrave, të tilla, si karburantet, pijet alkoolike, birra, vera etj.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.